16న కలెక్టర్లతో సీఎం కేసీఆర్ కీలక భేటీ
By తోట వంశీ కుమార్‌ Published on 14 Jun 2020 7:23 AM GMT
ఈనెల 16న సీఎం కేసీఆర్ జిల్లా కలెక్టర్లతో ప్రగతిభవన్‌లో సమావేశం కానున్నారు. రాష్ట్రంలో కరోనా పరిస్థితులు, నియంత్రిత సాగు, ప్రధాని మోదీతో జరిగే వీడియో కాన్ఫరెన్స్‌ తదితర అంశాల గురించి చర్చించనున్నారు. 16న ఉదయం 11.30గంటలకు ఈ సమావేశం జరగనుంది. అదనపు కలెక్టర్లు(స్థానిక సంస్థలు), జిల్లా గ్రామీణాభివృద్ధి సంస్థ అధికారి, జిల్లా పరిషత్‌ సీఈఓ, జిల్లా పంచాయతీ అధికారి తదితరులు ఈ సమావేశానికి హాజరు కానున్నారు.
దేశంలో కరోనా పరిస్థితిపై ఈ నెల 16,17 తేదీలలో ప్రధాని నరేంద్ర మోదీ అన్ని రాష్ట్రాల ముఖ్యమంత్రులతో వీడియో కాన్ఫరెన్స్‌ నిర్వహించనున్నారు. 17న ప్రధానితో వీడియో కాన్ఫరెన్స్‌లో కేసీఆర్ సమావేశం కానున్నారు. ఈ నేపథ్యంలో మంగళవారం కలెక్టర్లతో చర్చించి స్థానికంగా ఉన్న పరిస్థితుల గురించి తెలుసుకోనున్నారు. లాక్‌డౌన్‌ సడలింపుల తరువాత పరిణామాలు, ప్రజలు, వివిధ రంగాల స్థితిగతుల గురించి చర్చించనున్నారు. నియంత్రిత సాగు విధానం పై కూడా చర్చించనున్నారు. ఈ నెల 20 నుంచి హరితహారం ప్రారంభం కానుంది. హరితహారం అమలు గురించి సీఎం సమీక్షించనున్నారు.
