పహల్గామ్ దాడి తర్వాత నేను మరింత పేరు తెచ్చుకున్నాను : ర్యాలీలో లష్కరే తోయిబా టాప్ కమాండర్ సంచ‌ల‌న వ్యాఖ్య‌లు

లాహోర్‌లో లష్కరే తోయిబా టాప్ కమాండర్ సైఫుల్లా కసూరి పాక్ భద్రతా బలగాల భద్రతతో ర్యాలీ నిర్వహించడం పాకిస్థాన్ మాటలకు, చర్యలకు మధ్య ఉన్న వ్యత్యాసానికి ఉదాహరణ. పహల్గామ్‌లో జరిగిన ఉగ్రవాద దాడికి ప్రధాన కుట్రదారులలో కసూరి పేరు కూడా ఉంది. బుధవారం జరిగిన కసూరీ ర్యాలీలో చాలా మంది మోస్ట్ వాంటెడ్ ఉగ్రవాదులు, పాకిస్థాన్ ఇంటెలిజెన్స్ ఏజెన్సీ ఐఎస్ఐ అధికారులు, పాకిస్థాన్ పంజాబ్ అసెంబ్లీ స్పీకర్ మాలిక్ అహ్మద్ ఖాన్ పాల్గొన్నారు. ఈ ర్యాలీకి భద్రత కోసం పాకిస్థాన్ భద్రతా బలగాలను మోహరించారు. వేదికపై కసూరితోపాటు ఉగ్రవాది హఫీజ్ సయీద్ కుమారుడు తల్హా సయీద్ కూడా ఉన్నాడు.

ఈ ర్యాలీలో సైఫుల్లా కసూరి భారత్‌పై విషం చిమ్మాడు. పహల్గామ్ దాడికి బాధ్యత వహిస్తూ.. దాడికి పాల్పడిన తర్వాత నేను మరింత పేరు తెచ్చుకున్నానన్నాడు. ప్రధాని మోదీ చేసిన ప్రకటనను ప్రస్తావిస్తూ.. 'మనం బుల్లెట్‌లకు భయపడతామని నరేంద్ర మోదీ అనుకుంటున్నారు.. ఇది తప్పు అన్నారు.

పాకిస్తాన్ ఉగ్రవాదాన్ని అరికట్టకపోతే.. భారత్ బుల్లెట్లను ఎదుర్కోవాల్సి వస్తుందని భుజ్‌లో జరిగిన ర్యాలీలో ప్రధాని అన్నారు.

ఉగ్రవాది హఫీజ్ కుమారుడు తల్హా సయీద్ కూడా భారత్‌పై విషం చిమ్మాడు. జిహాద్‌లో పాల్గొన్న వారిని అల్లా ప్రేమిస్తాడని చెప్పాడు. పాక్‌లోని ఉగ్రవాద స్థావరాలపై భారత్‌ దాడులు చేసిన తర్వాత అక్కడి ఉగ్రవాదుల్లో భయానక వాతావరణం నెలకొంది. ఈ భయం నుంచి ఉగ్రవాదులను విడిపించే ప్రయత్నంలో భాగమే కసూరి ర్యాలీ.

ఇదిలావుంటే.. పహల్గామ్ దాడికి బాధ్యత వహించడానికి సైఫుల్లా కసూరి ఇంతకు ముందు నిరాకరించగా.. ఇప్పుడు బహిరంగంగానే ప్రస్తావిస్తున్నాడు.

వరల్డ్ మోస్ట్ వాంటెడ్ లిస్ట్‌లో చేరిన ఉగ్రవాదులు పాకిస్థాన్‌లో బహిరంగంగా ర్యాలీలు నిర్వహిస్తున్నారని, ఉగ్రవాదంపై చర్యలు తీసుకుంటున్నామని పాకిస్థాన్ అబద్ధాలు చెబుతూనే ఉంది.

పహల్గామ్ దాడికి ముందు సైఫుల్లా కసూరి పాకిస్థాన్‌లోని పంజాబ్‌లోని కంగన్‌పూర్ ఆర్మీ బేస్‌లో కనిపించాడు. ఇక్కడ కూడా భారత్‌పై విషం చిమ్మాడు.