హిజాబ్‌కు వ్య‌తిరేకంగా అర్ధ‌ నగ్నంగా తిరిగిన యువ‌తి

షరియా చట్టాన్ని కఠినంగా అమలు చేసే ఇరాన్‌లో ఒక సంఘటన జరిగింది, ఇది మొత్తం ప్రపంచాన్ని దిగ్భ్రాంతికి గురిచేసింది. ఇరాన్‌లోని ఇస్లామిక్ ఆజాద్ యూనివర్శిటీకి చెందిన ఒక విద్యార్థి ఇన్నర్‌వేర్ ధరించి క్యాంపస్‌లో తిరుగుతున్నట్లు సోషల్ మీడియాలో ఒక వీడియో వైరల్ అయ్యింది. ఇస్లామిక్ దుస్తులకు (హిజాబ్) వ్య‌తిరేకంగా యువ‌తి అర్ధ‌న‌గ్నంగా తిరిగింద‌ని చెబుతున్నారు. ఆ అమ్మాయి పేరు అహౌ దర్యాయై అని చెబుతున్నారు.

సమాచారం ప్రకారం.. యూనివర్శిటీలో అర్ధ‌ నగ్నంగా తిరుగుతున్నందుకు పోలీసులు ఆమెని అదుపులోకి తీసుకున్నారు. ఇరాన్‌లో హిజాబ్ ధరించకపోతే జైలు శిక్ష త‌ప్ప‌నిస‌రి. విద్యార్థి తీవ్ర మానసిక ఒత్తిడి (మానసిక ఆరోగ్య సమస్య)తో బాధపడుతుంద‌ని కొద్ది రోజుల క్రితం పోలీసులు తెలిపారు. విచారణ అనంతరం ఆమెని మానసిక వైద్యశాలకు తరలించారు.

యూనివర్శిటీ అధికారులు కూడా యువ‌తి మానసిక సమస్యలతో బాధపడుతుంద‌ని తెలిపారు. బాలిక మానసిక వైద్యశాలలో ఉందని ఇరాన్ పోలీసులు చెబుతున్నప్పటికీ.. ఆమె ఎక్కడ ఉందో ఇంకా నిర్ధారించలేదు. ఈ ఘటనపై ఇరాన్‌ జర్నలిస్టు మసీహ్‌ అలినేజాద్‌ మాట్లాడుతూ.. హిజాబ్ ధరించనందుకు ఇరాన్‌లోని యూనివర్సిటీ మోరాలిటీ పోలీసులు అహౌ దర్యాయీని వేధించారని అన్నారు. అహౌ దర్యాయ్ ప్రతీకారం తీర్చుకోవడానికి ఇలా చేసింది. ఈ సంఘటన ఇరాన్ మహిళల స్వేచ్ఛ కోసం జ‌రిగే పోరాటంలో ఒక ముఖ్యమైన సంఘటన. ఈ ఘటన టెహ్రాన్‌లోని సైన్స్ అండ్ రీసెర్చ్ యూనివర్శిటీలో జరిగిందని అలీజాద్ చెప్పారు.

విద్యార్థి నిర్బంధంపై పలు అంతర్జాతీయ సంస్థలు కూడా ఆందోళన వ్యక్తం చేశాయి. ఆమ్నెస్టీ ఇరాన్ విద్యార్థిని వెంటనే విడుదల చేయాలని డిమాండ్ చేసింది. "నవంబర్ 2 న హింసాత్మకంగా అరెస్టు చేయబడిన విశ్వవిద్యాలయ విద్యార్థిని ఇరాన్ అధికారులు వెంటనే మరియు బేషరతుగా విడుదల చేయాలి" అని మానవ హక్కుల సంస్థ శనివారం ట్విట్టర్‌లో ఒక పోస్ట్‌లో రాసింది.