అమెరికా-ఇరాన్ కాల్పుల విరమణపై భారత్ హర్షం!

అమెరికా, ఇరాన్ దేశాల మధ్య రెండు వారాల పాటు కాల్పుల విరమణ ఒప్పందం కుదరడాన్ని భారత్ ఘనంగా స్వాగతించింది. ఈ ఒప్పందం పశ్చిమాసియా ప్రాంతంలో శాశ్వత శాంతికి పునాది వేస్తుందని ఆశిస్తున్నట్లు భారత విదేశాంగ మంత్రిత్వ శాఖ 'ఎక్స్' (ట్విట్టర్) వేదికగా వెల్లడించింది.

యుద్ధం వల్ల కలిగే ఉద్రిక్తతలను తగ్గించడానికి చర్చలు, దౌత్యమే సరైన మార్గమని భారత్ మొదటి నుంచీ స్పష్టం చేస్తోందని ఈ సందర్భంగా గుర్తు చేసింది. ఈ సంఘర్షణ ఇప్పటికే ప్రపంచ దేశాలపై, ప్రజల జీవనంపై తీవ్ర ప్రభావం చూపిందని ఆవేదన వ్యక్తం చేసింది. ముఖ్యంగా పశ్చిమాసియాలో నెలకొన్న అనిశ్చితి కారణంగా ప్రపంచ ఇంధన సరఫరా మరియు అంతర్జాతీయ వాణిజ్య నెట్‌వర్క్‌లు దెబ్బతిన్నాయని పేర్కొంది.

ప్రస్తుత కాల్పుల విరమణ నేపథ్యంలో, హర్మూజ్ జలసంధి గుండా అంతర్జాతీయ నౌకాయానం మరియు వాణిజ్య కార్యకలాపాలు ఎటువంటి ఆటంకం లేకుండా స్వేచ్ఛగా కొనసాగుతాయని భారత్ ఆశాభావం వ్యక్తం చేసింది. పశ్చిమాసియాలో సాధారణ పరిస్థితులు నెలకొనడం ప్రపంచ ఆర్థిక వ్యవస్థకు అత్యంత అవసరమని భారత్ పునరుద్ఘాటించింది.