వెనిజువెలా అధ్యక్ష భవనం సమీపంలో కాల్పులు.. దేశ రాజధానిలో ఉద్రిక్తత

వెనిజువెలా రాజధాని కారకాస్‌లోని మిరాఫ్లోరెస్ అధ్యక్ష భవనం సమీపంలో కాల్పులు, తీవ్ర ఘర్షణలు చోటుచేసుకున్నట్లు అంతర్జాతీయ మీడియా కథనాలు వెల్లడించాయి. పరిస్థితి తమ నియంత్రణలోనే ఉందని అక్కడి అధికారులు తెలిపారు. అయితే రాజధాని నగరమంతా ఉద్రిక్త వాతావరణం నెలకొంది.

ఈ ఘటనలు, తొలగింపునకు గురైన అధ్యక్షుడు నికోలస్ మడూరో అమెరికా ఆపరేషన్‌లో అరెస్టై న్యూయార్క్ ఫెడరల్ కోర్టులో డ్రగ్స్ కేసుల్లో హాజరైన కొద్ది గంటలకే చోటుచేసుకోవడం గమనార్హం. మడూరో అరెస్టు అనంతరం, ఆయన ఉపాధ్యక్షురాలు డెల్సీ రోడ్రిగెస్ సోమవారం వెనిజువెలా తాత్కాలిక అధ్యక్షురాలిగా ప్రమాణ స్వీకారం చేశారు.

AFP వార్తా సంస్థ సమాచారం ప్రకారం, సోమవారం సాయంత్రం మిరాఫ్లోరెస్ అధ్యక్ష భవనం పైగా గుర్తు తెలియని డ్రోన్లు సంచరించడంతో భద్రతా దళాలు కాల్పులు జరిపాయి. ఈ ఘటనకు, దేశంలో కొనసాగుతున్న రాజకీయ సంక్షోభానికి సంబంధం ఉందా లేదా అన్నది ఇంకా స్పష్టత లేదు.

గత శనివారం రాత్రి జరిగిన అసాధారణ ఆపరేషన్‌లో, అమెరికా బలగాలు కారకాస్‌లోని ఒక సైనిక స్థావరంలోని నివాసం నుంచి మడూరో, ఆయన భార్య సిలియా ఫ్లోరెస్లను అరెస్టు చేశాయి. దీనిని మడూరో ప్రభుత్వం “సామ్రాజ్యవాద చర్య”గా అభివర్ణించింది. ఈ దంపతులపై నార్కో-టెర్రరిజం కుట్రలో పాలుపంచుకున్నారనే ఆరోపణలతో అమెరికా కేసులు నమోదు చేసింది.

అరెస్టు తర్వాత తొలి కోర్టు విచారణలో మడూరో, ఆయన భార్య ఆరోపణలను ఖండించారు. “నేను నిర్దోషిని. నేను నేరం చేయలేదు. నేను గౌరవనీయమైన వ్యక్తిని. నేను ఇంకా నా దేశానికి అధ్యక్షుడినే,” అని మడూరో వ్యాఖ్యానించారు. తదుపరి విచారణను మార్చి 17కు కోర్టు వాయిదా వేసింది.

న్యూయార్క్ కోర్టు వెలుపల మడూరోకు మద్దతుగా, వ్యతిరేకంగా ఉన్న నిరసనకారులు పెద్ద సంఖ్యలో గుమికూడారు. ఇదిలా ఉండగా, కారకాస్‌లో డెల్సీ రోడ్రిగెస్ తాత్కాలిక అధ్యక్షురాలిగా ప్రమాణ స్వీకారం చేస్తూ మడూరోకు మద్దతు ప్రకటించారు. అయితే అమెరికా చర్యలను ఎదుర్కొనే విషయంపై స్పష్టమైన ప్రకటన చేయలేదు.

ఇదే సమయంలో, మడూరో అనుచరుడైన జాతీయ అసెంబ్లీ అధ్యక్షుడు జార్జ్ రోడ్రిగెస్ — మడూరోను తిరిగి అధికారంలోకి తీసుకురావడానికి “అన్ని విధానాలు, వేదికలు, మార్గాలు వినియోగిస్తాం” అని హెచ్చరించారు. ఈ పరిణామాలు వెనిజువెలాను మరోసారి అంతర్జాతీయ రాజకీయ సంక్షోభ కేంద్రంగా మార్చాయి.