బంగ్లాదేశ్‌లో రాజకీయ సంక్షోభం..మహమ్మద్ యూనస్ రాజీనామా హెచ్చరిక

బంగ్లాదేశ్‌లో రాజకీయ సంక్షోభం నెలకొంది. తనకు పూర్తి మద్దతు లభించకపోతే రాజీనామా చేస్తానని తాత్కాలిక ప్రభుత్వాధిపతి ముహమ్మద్ యూనస్ హెచ్చరిక జారీ చేశారు. ఆర్మీ చీఫ్ జనరల్ వాకర్-ఉజ్-జమాన్ డిసెంబర్ నాటికి ఎన్నికలు నిర్వహించాలని స్పష్టం చేయడం, మరోవైపు బంగ్లాదేశ్ నేషనలిస్ట్ పార్టీ (బీఎన్‌పీ) ఎన్నికల నిర్వహణకు స్పష్టమైన ప్రణాళిక కోరుతూ ఆందోళనలు ఉధృతం చేసిన నేపథ్యంలో యూనస్ ఈ వ్యాఖ్యలు చేయడం ప్రాధాన్యం సంతరించుకుంది.

తాజా రాజకీయ పరిణామాలు, నిరసనల మధ్య తాను పనిచేయలేకపోతున్నానని యూనస్ ఆవేదన వ్యక్తం చేసినట్లు నేషనల్ సిటిజన్ పార్టీ (ఎన్‌సీపీ) నేత నహీద్ ఇస్లాం బీబీసీ బంగ్లాకు తెలిపారు. "నన్ను బందీగా పట్టుకున్నట్లుంది. ఇలా పనిచేయలేను. రాజకీయ పార్టీలన్నీ ఒక ఉమ్మడి అవగాహనకు రాలేవా?" అని యూనస్ తనతో అన్నట్లు నహీద్ పేర్కొన్నారు. గురువారం సాయంత్రం ప్రభుత్వ అతిథి గృహం 'జమున'లో యూనస్‌తో జరిగిన సమావేశంలో తాను కూడా ఉన్నానని, పదవిలో కొనసాగాలని నహీద్ ఆయన్ను కోరారని మరో ఎన్‌సీపీ నేత ఆరిఫుల్ ఇస్లాం అదీబ్ ఏఎఫ్‌పీ వార్తా సంస్థకు తెలిపారు. యూనస్ రాజీనామా చేయాలనుకున్నారని, అయితే కేబినెట్ సభ్యులు నచ్చజెప్పడంతో ప్రస్తుతానికి విరమించుకున్నారని అధికారిక వర్గాలు తెలిపాయి.

మరోవైపు, యూనస్ రాజీనామా బెదిరింపు వెనుక ఓ వ్యూహం ఉందని రాజకీయ విశ్లేషకులు భావిస్తున్నారు. ఎన్నికలు ఎప్పుడు జరిగినా యూనస్ పదవీకాలం ముగుస్తుంది. ఈ నేపథ్యంలో ఆర్మీ చీఫ్ ఎన్నికల డిమాండ్‌కు వ్యతిరేకంగా విద్యార్థులు, ఇస్లామిస్ట్ గ్రూపులతో కొత్త ఆందోళనలు సృష్టించేందుకే యూనస్ ఈ ఎత్తుగడ వేశారని అనుమానాలు వ్యక్తమవుతున్నాయి. శుక్రవారం ప్రార్థనల అనంతరం సైనిక కేంద్రం వైపు భారీ ప్రదర్శనలకు విద్యార్థి నాయకులు పిలుపునిచ్చినట్లు సమాచారం. ఇప్పటికే షేక్ హసీనా నేతృత్వంలోని అవామీ లీగ్‌పై నిషేధం ఉండటంతో, బీఎన్‌పీ ఎన్నికల్లో గెలిచి అధికారంలోకి రావాలని చూస్తోంది. ఎన్నికలు ఆలస్యమైతే తమ అవకాశాలు దెబ్బతింటాయని బీఎన్‌పీ ఆందోళన చెందుతోంది. రాబోయే కొద్ది రోజులు బంగ్లాదేశ్ రాజకీయాలకు అత్యంత కీలకమని పరిశీలకులు భావిస్తున్నారు