అమెరికా జైలులో గ్యాంగ్‌ వార్‌.. 41 మంది మహిళా ఖైదీలు మృతి

మధ్య అమెరికాలోని హోండురస్‌ జైలులోని మహిళా ఖైదీలు రెచ్చిపోయారు. హోండురాస్‌లోని మహిళా జైలులో జరిగిన ఘోరమైన అల్లర్లలో కనీసం 41 మంది మహిళలు మరణించారు. రాజధాని నగరం తెగుసిగల్పాకు వాయువ్యంగా 30 మైళ్ల దూరంలో ఉన్న తమారా మహిళా జైలులో మంగళవారం నాడు మహిళా ఖైదీలు రెండు వర్గాలు విడిపోయి తలపడ్డారు. వీరి మధ్య జరిగిన గొడవల్లో 41 మంది ఖైదీలు మృతి చెందారు. ఈ గ్యాంగ్‌ వార్‌లో కొందరు సజీవదహనం కాగా, మరికొందరు బుల్లెట్‌ గాయాలతో మరణించారు. మరో ఏడుగురు మహిళా ఖైదీలు గాయాలతో తెగుసిగల్పా ఆసుపత్రిలో చికిత్స పొందుతున్నారు.

జైళ్లలో అక్రమ కార్యకలాపాలను అరికట్టడానికి అధికారులు ఇటీవల చేసిన ప్రయత్నాల కారణంగానే అల్లర్లు జరిగాయని హోండురస్‌ జైళ్ల శాఖ అధికారి జూలిస్సా విల్లాన్యువా తెలిపారు. "మృతదేహాలను తొలగిస్తున్న ఫోరెన్సిక్ బృందాలు వారు 41 మంది మృతి చెందినట్లు లెక్కించారు" హోండురాస్ జాతీయ పోలీసు దర్యాప్తు సంస్థ ప్రతినిధి యూరి మోరా తెలిపారు. జైలు లోపల నుండి ప్రభుత్వం చూపిన వీడియో క్లిప్‌లలో అనేక పిస్టల్స్, అల్లర్ల తర్వాత దొరికిన కత్తులు, ఇతర బ్లేడెడ్ ఆయుధాలు ఉన్నాయి. ఈ ఘటనపై తాను కఠినమైన చర్యలు తీసుకుంటానని హోండురాన్ అధ్యక్షుడు జియోమారా కాస్ట్రో తెలిపారు.