వృత్తి నిపుణులకు ఇచ్చే హెచ్ 1 బీ వీసా కోసం అప్లై చేసే విధివిధానాలను మారుస్తున్నట్టు అమెరికా సిటిజన్ షిప్ అండ్ ఇమిగ్రేషన్ విభాగం ప్రకటించింది. మొత్తం ప్రక్రియను ఆన్ లైన్ చేస్తున్నట్టు ఈ విభాగం ప్రకటించింది. ఇందులో భాగంగా ఉద్యోగులను అమెరికాలో ఉండేందుకు స్పాన్సర్ చేస్తున్న కంపెనీ ఎలక్ట్రానిక్ విధానంలో రిజిస్టర్ చేసుకోవాలి. తమ కంపెనీ వివరాలను, స్పాన్సర్ చేస్తున్న ఉద్యోగి వివరాలను నమోదు చేయాల్సి ఉంటుంది. వచ్చే ఏడాది మార్చి 1 నుంచి మార్చి 20 వరకూ నమోదు చేయాల్సి ఉంటుంది. ఇది 2021-22 లో పనిచేసే వారి కోసం ఉద్దేశించింది. అంటే ఉద్యోగులు అక్టోబర్ 2020 నుంచి మాత్రమే పనిచేయగలరు. స్పాన్సర్ చేస్తున్న కంపెనీలు పది డాలర్ల నాన్ రిఫండబుల్ ఫీజును ప్రతి రిజిస్ట్రేషన్ కు చెల్లించాల్సి ఉంటుంది.

ఆ తరువాత లాటరీ విధానంలో ఉద్యోగులను ఎంపిక చేయడం జరుగుతుంది. కంపెనీలు ఇలా ఎంపికైన తమ ఉద్యోగి పూర్తి వివరాలను, వివిధ డాక్యుమెంట్లను పొందుపరచాల్సి ఉంటుంది. వీసా అప్లికేషన్లను నమోదు చేయడానికి పరిమితమైన సమయాన్ని ఏప్రిల్ నెలలో ఇవ్వడం జరుగుతుంది. ఇది ఏప్రిల్ 1 నుంచి ప్రారంభమౌతుంది. యూఎస్ డిగ్రీలు ఉన్న వారికి విధించిన 20000 పరిమితి తో పాటు మొత్తం యాభై వేల మందికి మాత్రమే ఈ వీసాను ఇవ్వడం జరుగుతుంది. ఈ పరిమితిలో ఎలాంటి మార్పూ ఉండదు.

‘ఈ ప్రక్రియ వల్ల పేపర్‌వర్క్ తగ్గుతుంది. డాటా ఎక్స్‌ఛేంజ్ సులువుగా జరుగుతుంది. దీంతో హెచ్1బీ దరఖాస్తులు చేసే కంపెనీలపై, అమెరికా ప్రభుత్వంపై కూడా ఆర్థికభారం తగ్గుతుంది’ అని అమెరికన్ ఇమిగ్రేషన్ విభాగం తెలిపింది. ఈ ప్రక్రియపై అమెరికన్ ఇమ్మిగ్రేషన్ సర్వీసు వివిధ కంపెనీలకు అవగాహన కల్పించనుంది. అదే విధంగా సాంపిల్ దరఖాస్తులు చేయించడం ద్వారా వారికి ఉన్న అనుమానాలను తొలగిస్తామని ఈ విభాగం ప్రకటించింది.

అంజి గోనె

నా పేరు గోనె. అంజి. న్యూస్‌మీటర్‌ తెలుగులో జర్నలిస్టుగా పని చేస్తున్నాను. గతంలో 99టీవీలో క్షేత్రస్థాయి అధ్యయనం చేశాను. మోజో టీవీలో సంవత్సరం పాటు జర్నలిస్టుగా పనిచేశాను. కలం నా బలం, సమస్యలే నా గళం. జర్నలిజం పట్ల ఇష్టంతో నేను ఈ వృత్తిని ఎంచుకున్నాను.