థ‌మ్స్ అప్ లోడ్ లారీ బోల్తా.. ఎగ‌బ‌డిన జ‌నం
Truck overturns on ORR at Taramatipet.ఇటీవ‌ల కాలంలో మ‌నుషుల్లో మాన‌వ‌త్వం చ‌చ్చిపోతుంది. సాటి మ‌నిషి ప్ర‌మాదంలో ఉంటే
By తోట వంశీ కుమార్‌ Published on 20 April 2022 7:12 AM GMT
ఇటీవ‌ల కాలంలో మ‌నుషుల్లో మాన‌వ‌త్వం చ‌చ్చిపోతుంది. సాటి మ‌నిషి ప్ర‌మాదంలో ఉంటే సాయం చేయాల్సింది పోయి.. కొంద‌రు ఫోటోలు, వీడియోలు తీస్తుండ‌గా, మ‌రికొంద‌రు ఏమో అందిన‌కాడికి దోచుకుపోతున్నారు. థ‌మ్స్ అప్ లోడ్‌తో వెలుతున్న లారీ బోల్తా ప‌డ‌గా.. డ్రైవర్, క్లీన‌ర్‌కు సాయం చేయాల్సింది పోయి.. వాహ‌నాల‌కు ఆపి రోడ్డుపై ప‌డిన థ‌మ్స్ అప్ బాటిల్స్‌ను అందిన కాడికి ఎత్తుకుపోయారు. ఈఘ‌ట‌న అబ్దుల్లాపూర్ మెట్ వ‌ద్ద చోటుచేసుకుంది.
వివ‌రాల్లోకి వెళితే.. రంగారెడ్డి జిల్లా అబ్దుల్లాపూర్‌మెట్ మండలం తారమతిపేట సమీపంలో ఓఆర్ఆర్ పై ఘ‌ట్‌కేస‌ర్ వైపు థమ్స్అప్ బాటిల్స్ లోడుతో ఓ లారీ వెలుతుండ‌గా.. టైర్ పేలిపోయింది. దీంతో లారీ అదుపుత‌ప్పి బోల్తా ప‌డింది. ఈ ఘ‌ట‌న‌లో లారీలోని థ‌మ్స్ అప్ బాటిళ్లు మొత్తం రోడ్డు పై ప‌డిపోగా.. లారీ డ్రైవర్, క్లీనర్ ల‌కు గాయాల‌య్యాయి.
వెంటనే ఆ మార్గంలో ప్ర‌యాణిస్తున్న వాహ‌న‌దారులు త‌మ వాహ‌నాల‌ను ఆపారు. డ్రైవర్, క్లీన‌ర్ల‌ను ప‌ట్టించుకోకుండా అందిన‌కాడికి థమ్స్అప్ బాటిల్స్‌ను ఎత్తుకెళ్లారు. క్ష‌ణాల్లోనే స‌ర‌కు మొత్తాన్ని ఖాళీ చేశారు. లారీ బోల్తా ప‌డ‌డంతో ఆ మార్గంలో భారీగా ట్రాఫిక్ స్తంబించింది. సమాచారం అందుకున్న పోలీసులు వెంటనే ఘటనా స్థలానికి చేరుకున్నారు. గాయ‌ప‌డిన వారిని ఆస్ప‌త్రికి త‌ర‌లించారు. లారీని రోడ్డు ప‌క్క‌కు తీసి ట్రాఫిక్‌కు క్ర‌మ‌బ‌ద్దీక‌రించారు.
