Hyderabad: మియాపూర్‌లో ఫార్మా కంపెనీ బస్సు బోల్తా.. 10 మందికి గాయాలు

హైదరాబాద్‌: మంగళవారం (మార్చి 17, 2026) ఉదయం మియాపూర్‌లో ఒక ప్రైవేట్ మినీ బస్సు బోల్తా పడిన ఘటనలో పది మంది ఫార్మా కంపెనీ ఉద్యోగులు గాయపడ్డారు. పోలీసుల కథనం ప్రకారం.. 'లీ ఫార్మా' (Lee Pharma) సంస్థకు చెందిన ఈ మినీ బస్సు, పది మంది ఉద్యోగులను తీసుకుని కేపీహెచ్‌బీ (KPHB) నుండి గడ్డపోతారం పారిశ్రామిక ప్రాంతంలోని కంపెనీ యూనిట్‌కు వెళ్తుండగా ఈ ప్రమాదం సంభవించింది.

ప్రమాదం జరిగిన వెంటనే స్థానికులు, పోలీసులు స్పందించి గాయపడిన వారిని చికిత్స నిమిత్తం సమీప ఆసుపత్రికి తరలించారు. అదృష్టవశాత్తూ ఎటువంటి ప్రాణనష్టం జరగలేదు. అతి వేగం లేదా సాంకేతిక లోపం కారణంగానే బస్సు అదుపు తప్పి బోల్తా పడి ఉండవచ్చని ప్రాథమికంగా భావిస్తున్నారు. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.