మల్కాజిగిరిలో 'హెల్మెట్ బ్యాంక్' షురూ.. పోలీసులే ఉచితంగా ఇస్తారు..కానీ!

హైదరాబాద్: మల్కాజిగిరి ట్రాఫిక్ విభాగం వాహనదారుల కోసం "హెల్మెట్ బ్యాంక్" అనే వినూత్న కార్యక్రమాన్ని ప్రారంభించింది. హెల్మెట్ లేకుండా వాహనం నడుపుతూ పట్టుబడితే, ట్రాఫిక్ పోలీసులు అక్కడికక్కడే మీకు ఉచితంగా హెల్మెట్‌ను అందిస్తారు. మీ ప్రాథమిక వివరాలను పోలీసులకు సమర్పించి, ఆ హెల్మెట్‌ను తీసుకోవచ్చు.

అయితే, మీరు సొంతంగా హెల్మెట్ కొనుగోలు చేసిన తర్వాత, 24 గంటల లోపు పోలీసుల వద్ద తీసుకున్న హెల్మెట్‌ను తిరిగి ఇచ్చేయాలి. మల్కాజిగిరిలోని సంగీత్ చౌరస్తా వంటి ప్రధాన కూడళ్లలో ఈ విధానాన్ని అమలు చేస్తున్నారు. కేవలం చలానాలు వసూలు చేయడం కంటే, వాహనదారుల ప్రాణాలను కాపాడటమే లక్ష్యంగా ఈ నిర్ణయం తీసుకున్నారు.