హైద‌రాబాద్ వాసుల‌కు అల‌ర్ట్‌.. నేడు ఈ మార్గంలో భారీగా ట్రాఫిక్.. వీలైతే ఈ మార్గంలో వెళ్లొద్దు

ఉప్పల్‌లోని రాజీవ్ గాంధీ ఇంటర్నేషనల్ క్రికెట్ స్టేడియంలో నేడు(జ‌న‌వ‌రి 18) భారత్‌, న్యూజిలాండ్ మధ్య జరగనున్న తొలి వన్డే క్రికెట్ మ్యాచ్‌ను దృష్టిలో ఉంచుకుని హైదరాబాద్ ట్రాఫిక్ పోలీసులు బుధవారం ట్రాఫిక్ రద్దీ ఉండే ప్రాంతాలను తెలియజేశారు.

సోమాజిగూడ నుంచి రాజీవ్ గాంధీ ఇంటర్నేషనల్ క్రికెట్ స్టేడియం వరకు రహదారిపై ఉదయం 8 గంటల నుంచి రాత్రి 10 గంటల వరకు ట్రాఫిక్ రద్దీ ఎక్కువగా ఉంటుందని హైదరాబాద్ ట్రాఫిక్ పోలీసులు తెలిపారు.

ముఖ్యంగా సోమాజిగూడ, గ్రీన్ ల్యాండ్స్, బేగంపేట్, రసూల్‌పురా, సీటీవో, ఎస్‌బీహెచ్ జంక్షన్, సెయింట్ జాన్స్ రోటరీ, సంగీత్ జంక్షన్, అల్లుగడ్డ బావి, మెట్టుగూడ జంక్షన్, తార్నాక, హబ్సిగూడ, ఎన్‌జీఆర్‌ఐ, ఉప్పల్‌లో ట్రాఫిక్ రద్దీ ఎక్కువగా ఉంటుందని చెప్పారు. కాబ‌ట్టి ఈ ప్రాంతాల్లో నివ‌సిస్తున్న పౌరులందరూ పైన పేర్కొన్న మార్గాల్లో ప్రయాణించకుండా ఇత‌ర మార్గాల్లో వెళ్లాల‌ని సూచించారు. అదే విధంగా వాహ‌న‌దారులు మ్యాచ్ ప్రారంభానికి, ముగింపు స‌మ‌యంలో ప్ర‌త్యామ్నాయ మార్గాల్లో వెళ్లాల‌ని తెలిపారు.

5 నిమిషాల‌కో మెట్రో

మ్యాచ్ నేప‌థ్యంలో నాగోల్‌-రాయ‌దుర్గం మార్గంలో అద‌న‌పు మెట్రో రైళ్లు అందుబాటులోకి తీసుకురానున్నారు. ఉద‌యం 11 నుంచి సాయంత్రం 4 గంట‌ల వ‌ర‌కు ప్ర‌తి 7 నిమిషాల‌కు ఒక రైలు బ‌దులు 5 నిమిషాల ఫ్రీక్వెన్సీతో, సాయంత్రం 4 గంట‌ల నుంచి రాత్రి 10 గంట‌ల వ‌ర‌కు 4 నిమిషాల ప్రీక్వెన్సీతో స‌ర్వీసులు న‌డ‌ప‌నున్న‌ట్లు మెట్రో వ‌ర్గాలు తెలిపాయి. స్టేడియం వ‌ద్ద ఉన్న మెట్రో స్టేష‌న్‌లో 10 కౌంట‌ర్ల‌ను ఏర్పాటు చేశారు.

నాలుగేళ్ల తర్వాత హైదరాబాద్‌లో వన్డే

దాదాపు నాలుగు సంవత్సరాల విరామం తర్వాత హైదరాబాద్ ఉప్పల్‌లోని రాజీవ్ గాంధీ అంతర్జాతీయ క్రికెట్ స్టేడియం వన్డే అంతర్జాతీయ మ్యాచ్‌కు ఆతిథ్యం ఇవ్వనుంది. హైదరాబాద్‌లో చివరి వన్డే 2019లో భారత్, ఆస్ట్రేలియా మధ్య జరిగింది.

ఈసారి స్టేడియంలోకి ప్రవేశించేందుకు భౌతిక టిక్కెట్లు తప్పనిసరి. ఆన్‌లైన్‌లో టిక్కెట్‌లను కొనుగోలు చేసిన కస్టమర్‌లు లావాదేవీకి సంబంధించిన ఇమెయిల్, SMS నిర్ధారణను అందుకుంటారు. ఈ కమ్యూనికేషన్‌లో QR కోడ్ కూడా ఉంటుంది. కస్టమర్‌లు తమ భౌతిక టిక్కెట్‌లను సేకరించేందుకు ఈ QR కోడ్‌ని రిడీమ్ కౌంటర్‌లో చూపించాలి. గచ్చిబౌలిలోని లాల్ బహదూర్ శాస్త్రి స్టేడియం, GMC బాలయోగి స్టేడియంలో విమోచన కౌంటర్లు ఉన్నాయి. వెరిఫికేషన్ కోసం ప్రేక్ష‌కులు ప్రభుత్వం ఆమోదించిన ఫోటో ID ప్రూఫ్ ఫోటోకాపీని కూడా తీసుకెళ్లాలి.