Hyderabad: షాపింగ్ మాల్స్లో స్పై కెమెరాలపై పోలీసుల ఫోకస్‌
మహిళల భద్రత , రక్షణను పెంపొందించే ప్రయత్నంలో హైదరాబాద్ పోలీసులు కీలక నిర్ణయం తీసుకున్నారు.
By అంజి
Hyderabad: షాపింగ్ మాల్స్లో స్పై కెమెరాలపై పోలీసుల ఫోకస్‌
హైదరాబాద్: మహిళల భద్రత , రక్షణను పెంపొందించే ప్రయత్నంలో హైదరాబాద్ పోలీసులు కీలక నిర్ణయం తీసుకున్నారు. షాపింగ్ మాల్స్, బహిరంగ ప్రదేశాల్లో రహస్య లేదా స్పై కెమెరాలను తనిఖీ చేసే కార్యక్రమాన్ని నేషనల్ సర్వీస్ స్కీమ్ (ఎన్‌ఎస్‌ఎస్) సహకారంతో నగర పోలీసులు ప్రారంభించారు. ఆగస్టు 15వ తేదీ గురువారం హైదరాబాద్ పోలీస్‌ కమిషనర్‌ కె శ్రీనివాసరెడ్డి, విద్యాశాఖ ప్రిన్సిపల్‌ సెక్రటరీ బి వెంకటేశం ఈ కార్యక్రమాన్ని ప్రారంభించారు.
తనిఖీల సమయంలో.. షాపింగ్ మాల్స్‌లోని మహిళలు దుస్తులు మార్చుకునే గదులు, వాష్‌రూమ్‌లు, ఇతర సున్నితమైన ప్రాంతాలను పరిశీలించడానికి హైదరాబాద్ పోలీసులు మహిళా నిపుణులను నియమిస్తారు. మహిళలు, చిన్న పిల్లల కోసం తీసుకుంటున్న భద్రతను నిర్ధారించడానికి పెద్ద, చిన్న షాపింగ్ ప్రాంతాలలో యాదృచ్ఛిక, ఆవర్తన తనిఖీలు నిర్వహించబడతాయని పోలీసులు ఒక పత్రికా ప్రకటనలో తెలిపారు.
పత్రికా ప్రకటన ప్రకారం.. ప్రతి మాల్, దుకాణాన్ని క్షుణ్ణంగా తనిఖీ చేసి, స్పై కెమెరాలు లేనివిగా ధృవీకరించే వరకు ఈ కార్యక్రమం కొనసాగుతుంది. మహిళల భద్రత, రక్షణను గణనీయంగా పెంచడం దీని లక్ష్యం. ఐదు రోజుల క్రితం బెంగుళూరులోని థర్డ్ వేవ్ కాఫీ అవుట్‌లెట్‌లో స్పై కెమెరా కనిపించడంతో ఈ కార్యక్రమం ప్రాముఖ్యతను సంతరించుకుంది. కాగా ఏదైనా షాపింగ్ మాల్‌లో తనిఖీ తర్వాత స్పై కెమెరా లేదని నిర్దారణ జరిగితే, ఆ ప్రాంతాన్ని వ్యక్తిగత సురక్షిత ప్రాంతంగా ప్రకటించి, ఆ మేరకు 'నో హిడెన్‌ కెమెరాస్‌ ఇన్‌సైడ్‌' అని స్టిక్కర్ అంటిస్తారు.
