HYD: మ్యాన్హోల్స్లో దుప్పట్లు, బెడ్షీట్లు..విస్తుపోయిన HMWSSB అధికారులు
హైదరాబాద్లోని చందర్ నాయక్ తండాలో మురుగునీరు పొంగిపొర్లుతున్న సమస్యను పరిష్కరించడానికి HMWS&SB మాదాపూర్ సర్కిల్ అధికారులు మూడు రోజుల పాటు శ్రమించి పరిస్థితిని పునరుద్ధరించారు.
By - Knakam Karthik
HYD: మ్యాన్హోల్స్లో దుప్పట్లు, బెడ్షీట్లు..విస్తుపోయిన HMWSSB అధికారులు
హైదరాబాద్లోని చందర్ నాయక్ తండాలో ప్రధాన మురుగునీటి పైపులైన్ పూర్తిగా మూసుకుపోవడంతో, రోడ్లపైకి మురుగునీరు పొంగిపొర్లుతున్న సమస్యను పరిష్కరించడానికి HMWS&SB మాదాపూర్ సర్కిల్ అధికారులు మూడు రోజుల పాటు శ్రమించి పరిస్థితిని పునరుద్ధరించారు.
అయితే, ఈ పూడికతీత సమయంలో మ్యాన్హోల్స్లో దుప్పట్లు, బెడ్షీట్లు, బట్టలు మరియు ప్లాస్టిక్ వంటి ఘన వ్యర్థాలు భారీగా బయటపడటం అధికారులను విస్తుపోయేలా చేసింది. ప్రజలు మ్యాన్హోల్స్ను చెత్తాచెదారం వేసే వేదికలుగా మార్చుకోవడం వల్లే ఈ మురుగునీటి ఓవర్ఫ్లో సమస్య పదేపదే తలెత్తుతోందని బోర్డు స్పష్టం చేసింది.
మరోవైపు హోటళ్లు, బేకరీలు, ఫుడ్ కోర్టులు మరియు బహుళ అంతస్తుల భవనాలు తమ వ్యర్థాలను నేరుగా మురుగునీటి నెట్వర్క్లోకి వదలడం వల్ల ఆహార పదార్థాలు పైపుల్లో పేరుకుపోయి వ్యవస్థపై ఒత్తిడి పెంచుతున్నాయని అధికారులు గుర్తించారు. నిబంధనల ప్రకారం ప్రతి వాణిజ్య సంస్థ తమ ప్రాంగణంలో తప్పనిసరిగా సిల్ట్ చాంబర్లను నిర్మించుకోవాలని, తద్వారా ఘన వ్యర్థాలు మురుగునీటి పైపులైన్లలోకి చేరకుండా అరికట్టవచ్చని అధికారులు ఆదేశాలు జారీ చేశారు. ఎన్నిసార్లు పూడికతీత చేపట్టినా, ప్రజలు మరియు సంస్థలు బాధ్యతాయుతంగా వ్యవహరించకపోతే ఈ సమస్యకు శాశ్వత పరిష్కారం లభించదని బోర్డు ఆందోళన వ్యక్తం చేసింది.
