జింఖానా తొక్కిసలాట ఘటన.. అజారుద్దీన్ పై కేసు

HCA President Mohammad Azharuddin members booked allegation of tickets being sold in 'black'.జింఖానా గ్రౌండ్స్‌లో

By తోట‌ వంశీ కుమార్‌  Published on  23 Sep 2022 3:58 AM GMT
జింఖానా తొక్కిసలాట ఘటన.. అజారుద్దీన్ పై కేసు

జింఖానా గ్రౌండ్స్‌లో జ‌రిగిన తొక్కిస‌లాట ఘ‌ట‌న‌ను ప్ర‌భుత్వం సీరియ‌స్‌గా తీసుకుంది. హైద‌రాబాద్ క్రికెట్ సంఘం(హెచ్‌సీఏ) అధ్య‌క్షుడు అజారుద్దీన్‌తో పాటు ఇత‌ర స‌భ్యుల‌పై హైద‌రాబాద్ పోలీసులు కేసు న‌మోదు చేశారు. తొక్కిసలాటలో గాయపడిన అదితి ఆలియా, ఎస్ఐ ప్రమోద్ లు బేగంపేట పోలీస్ స్టేష‌న్‌లో ఫిర్యాదు చేశారు. ప్రధానంగా హెచ్‌సీఏపై టికెట్‌ నిర్వాహణ, బ్లాక్‌లో అమ్మారన్న ఆరోపణలపై సెక్షన్ 420, సెక్షన్ 21, సెక్షన్ 22/76 కింద పోలీసులు కేసు నమోదు చేశారు.

ఆదివారం ఉప్ప‌ల్ వేదిక‌గా భార‌త్‌, ఆస్ట్రేలియా జ‌ట్ల మ‌ధ్య మూడో టీ20 మ్యాచ్ జ‌ర‌గ‌నుంది. ఈ మ్యాచ్ టికెట్లు కొనుగోలు చేసేందుకు వేలాది మంది అభిమానులు గురువారం జింఖానా గ్రౌండ్స్‌కు వ‌చ్చారు. ఈ క్ర‌మంలో తొక్కిస‌లాట చోటు చేసుకుంది. ప‌లువురికి గాయాలు అయ్యాయి. టికెట్ల అమ్మ‌కంలో స‌రైన జాగ్ర‌త్త‌లు పాటించ‌లేద‌ని, అందువ‌ల్లే తొక్కిస‌లాట జ‌రిగింద‌ని అభిమానులు ఆగ్ర‌హం వ్య‌క్తం చేస్తున్నారు. అజారుద్దీన్ బాధ్య‌తా రాహిత్యంవ‌ల్లే ఇదంతా జ‌రిగింద‌ని ఆరోపించారు. అజారుద్దీన్ బాధ్యతాయుతంగా వ్యవహరించి ఉంటే ఇలా జరిగేది కాదంటున్నారు.


న్యూస్‌మీటర్‌తో ఇన్‌స్పెక్టర్ ఆఫ్ పోలీస్- బేగంపేట పి శ్రీనివాసరావు మాట్లాడుతూ.. టి20 క్రికెట్ మ్యాచ్ టిక్కెట్లలో అధిక వాటాను బ్లాక్‌లో విక్రయించారని మహిళ ఆరోపించింది. గురువారం సికింద్రాబాద్‌లోని జింఖానా గ్రౌండ్స్‌లో హెచ్‌సిఎ నియమించిన కాంట్రాక్టర్ పేటిఎమ్ కౌంటర్ ప్రారంభించినప్పుడు, కేవలం 3000 టిక్కెట్లు మాత్రమే మిగిలి ఉన్నాయని, మిగిలినవి అమ్ముడుపోయాయని ఒక వ్యక్తి చెప్పడంతో ప్రేక్ష‌కులు విస్తుపోయారు. ఈ క్ర‌మంలో తొక్కిస‌లాట చోటు చేసుకున్న‌ట్లు తెలిపారు.

దాదాపు 20 మంది క్రికెట్ అభిమానులు గాయపడగా.. వారిలో ఇద్దరు స్పృహతప్పి పడిపోయారు. వీరిలో ఏడుగురిని ఆసుపత్రిలో చేర్పించారు. వైద్యులు తెలిపిన వివరాల ప్రకారం.. ఈ ఘటనతో గాయపడిన వారు తీవ్ర భయాందోళనలకు గురయ్యారు. వారు సాధార‌ణ స్థితికి రావ‌డానికి చాలా స‌మ‌యం ప‌ట్టింద‌న్నారు. ఇద్ద‌రు రోగులు సుజాత‌, సాయి కిషోర్ డిశ్చార్జ్ అయ్యారు.


సుజాత మోకాలికి గాయమైంది కానీ ఇప్పుడు నిలకడగా ఉంది. సుజాతను అంబులెన్స్‌లో తీసుకెళ్తున్న వీడియో వైరల్‌గా మారింది. ఈ గొడవలో ఆమె స్పృహతప్పి పడిపోయింది. ఐదు గంటల పాటు ఆమెను అబ్జర్వేషన్‌లో ఉంచి డిశ్చార్జ్ చేశారు. సాయి కిషోర్ మృదు కణజాల గాయంతో బాధపడ్డాడు, కానీ ఇప్పుడు అతను స్థిరంగా ఉన్నాడు.

ఆసుపత్రిలో చేరిన ఏడుగురిలో ఇద్దరు పోలీసులు ఫ్రాక్చర్లకు గురయ్యారు, మిగిలిన ఐదుగురు ఫ్రాక్చర్లు మరియు మృదు కణజాల గాయంతో బాధపడుతున్నారు. రంజిత (48) ఛాతీలో మొద్దుబారిన గాయం ఉంది. ఆదిత్యనాథ్ (23) ఎడమ చీలమండ ఫ్రాక్చర్; అలియా (19)కు ఛాతీలో గాయం, పోలీసు కానిస్టేబుల్ శ్రీకాంత్ (36) ముక్కు ఎముక విరగగా, కానిస్టేబుల్ శ్రీనాథ్ కు కూడా ఫ్రాక్చర్ అయింది. జనాన్ని వేరు చేసి అడ్డుకునేందుకు ప్రయత్నించడంతో వారు గాయపడ్డారు.

Next Story
Share it