Hyderabad: బీరు బాటిళ్లతో యువతీయువకుడు హల్‌చల్‌

బీరు బాటిళ్లతో రోడ్డుపై యువతీయువకుడు హల్‌చల్‌ చేసిన ఘటన హైదరాబాద్‌ నగరంలోని నాగోల్‌ పోలీస్‌ స్టేషన్‌ పరిధిలో జరిగింది. స్థానికులు తెలిపిన వివరాలు ఇలా ఉన్నాయి. ఫతుల్లాగూడ సమీపంలో రోడ్డుపై యువతీయువకుడు బీర్లు, సిగరెట్‌ తాగుత, కారులో పాటలు పెట్టుకుని హల్‌చల్‌ చేశారు. పబ్లిక్‌ ప్లేస్‌లో ఈ న్యూసెన్స్‌ ఏంటని ఉదయం అక్కడ వాకింగ్‌ చేస్తున్న వారు ప్రశ్నించడంతో వారు వాగ్వాదానికి దిగి దుర్భాషలాడారు. పోలీస్‌ స్టేషన్‌లో ఫిర్యాదు చేస్తామని వాకర్స్‌ తెలిపారు.

వాకర్స్‌తో వాగ్వాదానికి దిగి బూతులు తిట్టారు. చేతిలో బీరు బాటిళ్లు పట్టుకొని కారులో పాటలు పెట్టి నానా హంగామా చేశారు యువతీ యువకుడు. దీనికి సంబంధించిన వీడియో సోషల్ మీడియాలో వైరల్ గా మారింది. తాము పబ్లిక్ ప్లేస్‌లో కారు ఆపి మద్యం సేవిస్తున్నామని ఎవరికీ ఎటువంటి డిస్టర్బెన్స్ చేయడం లేదంటూ ఆ యువతి రెచ్చిపోతూ హల్చల్ సృష్టించింది. అంతే కాదండోయ్ ఈ మహానటి మద్యం మత్తులో తాము ఏం చేశామంటూ వీడియో తీస్తున్నారంటూ వీడియో తీస్తున్న వ్యక్తిపై దాడి చేయడానికి ప్రయత్నించింది. యువతి చేసిన హంగామా కి స్థానికులు మార్నింగ్ వాక్ చేసే వారందరూ అక్కడ గుమ్మికూడారు.

అక్కడికి వచ్చిన పెద్దవారు ఎంతగా నచ్చచెప్పినా కూడా ఆ యువతీ యువకుడు ఏమాత్రం పట్టించుకోకుండా మద్యం సేవిస్తూ రోడ్డుమీద నానా రచ్చ రచ్చ సృష్టించారు. నడిరోడ్డు మీద కారును ఆపి మద్యం సేవిస్తూ హల్చల్ సృష్టిస్తున్న కూడా వాహనదారులు ఏ మాత్రం పట్టించు కోకుండా వెళ్తున్నారంటూ వీడియో తీస్తున్న వ్యక్తి ఆగ్రహం వ్యక్తం చేశారు. మార్నింగ్ వాక్ కు వచ్చిన వారందరూ కలిసి ఒక్కసారిగా ఆగ్రహం వ్యక్తం చేయడంతో తోక ముడుచుకొని ఆ యువతి యువకుడు కారులో తుర్రుమని పారిపోయారు. అయితే ఈ ఘటనకు సంబంధించిన వీడియో ఇప్పుడు సోషల్ మీడియాలో వైరల్ గా మారింది. దీనిపై పోలీసులు ఏ విధంగా స్పందిస్తారో వేచి చూడాల్సిందే.