FactCheck : మనిషికి-పందికి హైబ్రిడ్ ను సృష్టించారా..?

వింతగా కనిపిస్తున్న శిశువు ఫొటోలతో పాటు ఓ కథనం సోషల్ మీడియాలో హల్ చల్ చేస్తోంది. వైరల్ చిత్రాలలో ఓ పెద్ద పంది పక్కన ఉంచిన శిశువును చూపుతున్నాయి. వింత శిశువును "పిగ్ హ్యూమన్ హైబ్రిడ్ బేబీ" అని పిలుస్తున్నారు.

పంది-హ్యూమన్ హైబ్రిడ్ శిశువు నిజమైనది కాకపోవచ్చు. అయితే ఈ ఫోటోలు సోషల్ మీడియా వినియోగదారులలో చాలా ఉత్సుకతను సృష్టించాయి.

నిజ నిర్ధారణ :

చిత్రంలో కనిపించే శిశువు ఒక ఆర్ట్ వర్క్ మాత్రమే.. నిజమైన మానవ-పంది హైబ్రిడ్ కాదు. కాబట్టి చిత్రాలు నకిలీవని NewsMeter కనుగొంది.

వైరల్ ఇమేజ్ రివర్స్ ఇమేజ్ సెర్చ్ ను నిర్వహించినప్పుడు, మేము అదే చిత్రాలను 'లైరా మగానుకో' అనే ఆర్టిస్ట్ Instagram ఖాతాలో కనుగొన్నాము.

పేరును క్లూగా తీసుకొని, మేము కీవర్డ్ సెర్చ్ ను నిర్వహించాము. లైరా మగనుకో మిలాన్ ప్రాంతానికి చెందిన ఒక కళాకారిణి అని మేము కనుగొన్నాము. హైపర్-రియల్ సిలికాన్ శిల్పాలను తయారు చేస్తారు.

ఆమె ఇన్‌స్టాగ్రామ్ పేజీని జాగ్రత్తగా విశ్లేషించినప్పుడు, ఆమె వింతగా ఉండే హైపర్-రియల్ సిలికాన్ శిల్పాలను తీర్చి దిద్దడంలో పాపులర్ అయిందని మేము కనుగొన్నాము.

ఆమె వెబ్‌సైట్ లో కూడా అదే విషయాలను తెలిపింది. మేము ఆమె Facebook పేజీలో కూడా అదే చిత్రాలను కనుగొన్నాము. ఆమె ఆర్ట్ వర్క్ ను కొందరు కావాలనే తప్పుడు కథనాలతో వైరల్ చేస్తూ వస్తున్నారు.

మీరు Etsyలో ఆమె క్రియేషన్‌ ను కనుగొనవచ్చు.

దీన్ని బట్టి, పిగ్-హ్యూమన్ హైబ్రిడ్ బేబీ నిజమైనది కాదని స్పష్టమైంది. కాబట్టి వైరల్ దావా తప్పు.