'నోరు మూసుకొని ఉంటా'.. విజయ్ దేవరకొండ ఇంట్రెస్టింగ్‌ కామెంట్స్

యంగ్ హీరో విజయ్ దేవరకొండకు యూత్‍లో మంచి క్రేజ్ ఉంది. తన రాబోయే బహుభాషా చిత్రం 'కుషి' ట్రైలర్‌కు చాలా మంచి రెస్పాన్స్ అందుకుంటున్న నటుడు విజయ్ దేవరకొండ, తన బాలీవుడ్ తొలి చిత్రం 'లైగర్' బాక్సాఫీస్ వద్ద పరాజయం పాలైన విషయం తెలిసిందే. బుధవారం హైదరాబాద్‌ వేదికగా 'ఖుషి' ట్రైలర్ లాంచ్ జరిగింది. ఈ సందర్భంగా విజయ్‌ మాట్లాడుతూ.. 'లైగర్' తన జీవితంలో మొదటి వైఫల్యం కాదని, చాలా హిట్ సినిమాలను కలిగి ఉన్నట్లే, ఇంతకుముందు కూడా చాలా ఫ్లాప్‌లను ఎదుర్కొన్నానని చెప్పాడు. ''సినిమా హిట్‌ కాకపోతే చాలా బాధేస్తుంది. నేను గతంలో చాలా ఫ్లాప్‌లను చవిచూశాను. 'లైగర్' సినిమా మొదటిది కాదు. ఇంతకు ముందు కూడా నాకు చాలా హిట్స్ వచ్చాయి. నేను ఫ్లాప్‌లు, హిట్‌లను అనుభవిస్తూనే ఉంటాను. ఎందుకంటే చివరికి మేము స్టోరీలు చెప్పడానికి ప్రయత్నిస్తున్నాము'' అని విజయ్‌ అన్నారు.

సృజనాత్మక వ్యక్తిగా, తనకు వీలైనన్ని కథలు చెప్పాలనుకుంటున్నానని, అలా చేసే ప్రక్రియలో చాలా రిస్క్‌లు ఉంటాయని తెలిపారు. ఏదైనా క్రియేటివ్‍గా చేయాలనేదే తన లక్ష్యమని, తాను వైఫల్యాలకు భయపడనని అన్నారు. లైగర్ సినిమాను తాను ముందుగా చూడకుండానే ప్రమోషన్లు చేశానని విజయ్ తెలిపాడు. తాను ఏదైనా చెబితే జరుగుతుందని అనుకున్నానని, అందుకే హిట్ అని చెప్పానని.. కానీ అది హిట్‌ కాలేదని అన్నాడు. అందుకే కాస్త నిరాశ చెందానని చెప్పాడు. అందుకే తర్వాతి 3 సినిమాలకు తక్కువగా మాట్లాడాలని నిర్ణయించుకున్నట్టు విజయ్ దేవరకొండ చెప్పాడు.

సినిమా హిట్ అని ఫీలయ్యాకే బ్లాక్‍బాస్టర్ అని అంటానని, తర్వాతి 3 సినిమాలకు తాను తన నోటిని మూసుకోవాలని అనుకుంటున్నానని చెప్పాడు. తన తదుపరి మూడు చిత్రాలకు ఈ శిక్ష వేసుకున్నానని, నోరు మూసుకొని ఉంటానని విజయ్ దేవరకొండ అన్నాడు. 'లైగర్ - సాలా క్రాస్‌బ్రీడ్' అనేది పూరి జగన్నాథ్ రచన, దర్శకత్వం వహించిన స్పోర్ట్స్ యాక్షన్ చిత్రం. హిందీ, తెలుగు భాషల్లో ఏకకాలంలో చిత్రీకరించబడిన ఈ చిత్రంలో విజయ్ దేవరకొండ, అనన్య పాండే నటించారు. ఈ చిత్రంలో రమ్య కృష్ణ, రోనిత్ రాయ్ కీలక పాత్రలు పోషించారు. మాజీ ప్రపంచ హెవీవెయిట్ ఛాంపియన్ యూఎస్‌ బాక్సర్ మైక్ టైసన్ పొడిగించిన అతిధి పాత్రలో నటించారు. ఇదిలా ఉంటే.. తాజాగా విజయ్‌కి జోడీగా సమంత రూత్ ప్రభు నటించిన 'ఖుషి' సెప్టెంబర్ 1న థియేటర్లలో విడుదల కానుంది.