'నా భార్య వేధిస్తోంది.. విడాకులు ఇప్పించండి'.. కోర్టును ఆశ్రయించిన టాలీవుడ్‌ నటుడు

టాలీవుడ్‌ నటుడు నరేష్‌, ఆయన మూడో భార్య రమ్య రఘుపతి మధ్య వివాదం రోజుకో మలుపు తిరుగుతోంది. తాజాగా తన మూడో భార్య రమ్య రఘుపతి నుంచి విడాకులు కోరుతూ తన వ్యక్తిగత జీవితంలో కొనసాగుతున్న వివాదంపై టాలీవుడ్ నటుడు నరేష్ హైకోర్టును ఆశ్రయించారు. రోహిత్‌ శెట్టి అనే వ్యక్తితో కలిసి రమ్య తనను చంపేస్తానని బెదిరిస్తోందని ఆరోపించారు. 2023 న్యూ ఇయర్ సందర్భంగా నటి పవిత్రా లోకేష్‌తో తనకున్న సంబంధాన్ని బహిరంగపరిచిన నరేష్, తన వ్యక్తిగత జీవిత వివరాలను కోర్టుకు అందించాడు. తనకు రమ్యను మార్చి 3, 2010న పెళ్లయిందని, 2012లో ఇద్దరికి రణవీర్ అనే కుమారుడు ఉన్నాడని నరేష్ తన పిటిషన్‌లో పేర్కొన్నాడు.

తాను రమ్య నుంచి ఎలాంటి కట్నం తీసుకోలేదని, బదులుగా రూ.30 లక్షల విలువైన బంగారు ఆభరణాలను ఆమెకు కానుకగా ఇచ్చానని, పెళ్లయినప్పటి నుంచి రమ్య తనను వేధిస్తోందని నరేష్ ఆరోపించాడు. తన తల్లిని హైదరాబాద్‌లో వదిలి బెంగళూరులో తనతో ఉండాలని ఆమె తనపై ఒత్తిడి తెచ్చిందని పేర్కొన్నాడు. టాలీవుడ్ నటుడు నరేష్.. రమ్య తన పేరును ఉపయోగించి ఇతరుల నుండి రుణాలు పొందారని ఆరోపించాడు. ఆమె తన కుటుంబం నుండి వివిధ రూపాల్లో డబ్బు వసూలు చేసిందని ఆరోపించారు.

రమ్య తన ఆస్తులను ఆమె పేరు మీద బదలాయించాలని బేరసారాలు ప్రారంభించిందని, అందుకు నిరాకరించడంతో బెదిరించడం ప్రారంభించాడని నరేష్ పేర్కొన్నాడు. 2022 ఏప్రిల్‌లో గుర్తుతెలియని దుండగులు తన ఇంట్లోకి చొరబడ్డారని, ఈ విషయమై గచ్చిబౌలి పోలీస్ స్టేషన్‌లో ఫిర్యాదు చేసినట్లు గుర్తు చేశారు. మాజీ మంత్రి, కాంగ్రెస్ నాయకుడు రఘువీరా రెడ్డి నుంచి తనకు బెదిరింపు కాల్స్ వచ్చాయని, తనను భౌతికంగా తొలగించేందుకు తన భార్య ఓ ముఠాను నియమించుకుందని నరేష్ ఆరోపించారు. రమ్య రఘుపతి తన మొబైల్‌ని హ్యాక్ చేసి మెసేజ్‌లన్నింటినీ ట్రాక్ చేసిందని చెప్పాడు. తన భార్య బెదిరింపులపై ఆందోళన వ్యక్తం చేసిన అతను తన భార్య రమ్య నుండి విడాకులు ఇవ్వాలని కోర్టును ఆశ్రయించాడు.