రేపే 'మాచర్ల నియోజకవర్గం' నుంచి మరో సాంగ్‌ రిలీజ్‌

హిట్‌, ఫ్లాప్‌తో సంబంధం లేకుండా వరుస సినిమాలతో టాలీవుడ్‌ హీరో నితిన్‌ ప్రేక్షకులను అలరిస్తుంటాడు. గతేడాది ఏకంగా 3 సినిమాలతో సందడి చేశాడు. 'రంగ్‌దే' మూవీ హిట్‌ కొట్టగా.. 'చెక్‌' మూవీ ఫ్లాప్‌గా మిగిలింది. ఇక 'మ్యాస్ట్రో' ఓటీటీలో విడుద‌లై పాజిటివ్‌ టాక్‌ తెచ్చుకుంది. ప్రస్తుతం నితిన్ న‌టించిన‌ 'మాచ‌ర్ల నియోజ‌క‌వ‌ర్గం' రిలీజ్‌కు సిద్ధంగా ఉంది. నితిన్‌ రొటీన్‌ సినిమాలకు భిన్నంగా ఈ సినిమా ఉండబోతోంది. ఈ సారి నితిన్ పొలిటిక‌ల్ థ్రిల్ల‌ర్ క‌థ‌తో రానున్నాడు. ప్ర‌ముఖ ఎడిట‌ర్ ఎంఎస్‌.రాజ‌శేఖ‌ర్ రెడ్డి ఈ సినిమాతో ద‌ర్శ‌కుడిగా ప‌రిచ‌య‌ం అవుతున్నారు. ఇప్ప‌టికే ఈ మూవీ నుండి విడుదలైన పోస్ట‌ర్‌లు, గ్లింప్స్ ప్రేక్ష‌కుల‌ను విప‌రీతంగా ఆక‌ట్టుకున్నాయి. ఈ మూవీ ఆగ‌స్టు 12న విడుద‌ల కానుంది.

ఈ క్ర‌మంలో ప్రమోషన్స్‌ షురూ చేసింది. తాజాగా చిత్ర‌యూనిట్‌ మ‌రో అప్‌డేట్‌ను ప్ర‌క‌టించింది. ఈ సినిమాలోని 'అదిరిందే' అంటూ సాగే మెలోడీ సాంగ్‌ను జూలై 23న (రేపు) విడుద‌ల చేయ‌నున్న‌ట్లు మేక‌ర్స్ తాజాగా ప్ర‌క‌టించారు. ఇప్ప‌టికే ఈ మూవీ నుంచి విడుద‌లైన 'రా రా రెడ్డి' సాంగ్‌ యూట్యూబ్‌లో సెన్సేష‌న్ క్రియేట్ చేస్తున్న విష‌యం తెలిసిందే. నితిన్ ఈ చిత్రంలో గుంటూరు జిల్లా క‌లెక్ట‌ర్‌గా క‌నిపించ‌నున్నాడు. కృతిశెట్టి, క్యాథెరీన్ థెరిస్సా హీరోయిన్లుగా న‌టిస్తున్నారు. ఆదిత్య మూవీస్ అండ్‌ ఎంట‌ర్టైన‌మెంట్స్, శ్రేష్ఠ్ మూవీస్ బ్యాన‌ర్ల‌పై ఎన్‌.సుధాక‌ర్ రెడ్డి, నిఖితా రెడ్డి ఈ సినిమాను నిర్మిస్తున్నారు.