లవ్‌స్టోరీ టీజర్‌.. సాయి పల్లవిని తీసుకువెళ్లిపోతున్న చైతూ..!

ప్రేమ కథల్ని తనదైన శైలిలో తెరకెక్కించే శేఖర్ కమ్ముల ద‌ర్శ‌క‌త్వంలో వ‌స్తున్న చిత్రం ల‌వ్‌స్టోరి. అక్కినేని నాగ‌చైత‌న్య క‌థ‌నాయకుడిగా తెర‌కెక్కుతున్న ఈ చిత్రంలో సాయిప‌ల్ల‌వి హీరోయిన్‌గా న‌టిస్తుంది. అమిగోస్ క్రియేషన్స్ పతాకంపై ఈ చిత్రం తెరకెక్కుతోంది. ఈ చిత్రంపై చైతూ భారీ ఆశ‌ల‌నే పెట్టుకున్నాడు. సంక్రాంతి పండుగ‌ను పురస్క‌రించుకుని ల‌వ్‌స్టోరీ టీజ‌ర్‌ను విడుద‌ల చేశారు. ఒక నిమిషం నిడివిగ‌ల ఈ టీజ‌ర్ శేఖ‌ర్ మార్క్ స‌న్నివేశాల‌తో సాగింది. టీజర్‌లో నాగ చైతన్య మాస్‌ లుక్‌లో కనిపించాడు.

మధ్య తరగతి వెతల్ని యథావిధిగానే చూపిస్తున్నారు కమ్ముల. బుల్లి కుటుంబాలు ఆత్మీయతలు అందులో సున్నితత్వం ఇవన్నీ ఈ టీజర్ లో కనిపిస్తున్నాయి. `వదిలేస్తావా?` అని ఎంతో ఆవేదనగా సాయిపల్లవి ప్రశ్నించగానే గతుక్కుమన్న ప్రేమికుడు చై ఆ తర్వాత చేసిన పనేమిటో కన్ఫ్యూజన్ గానే ఉంది. అన్నట్టు చై ఉన్నట్టుండి సాయి పల్లవిని లాక్కెళ్లిపోతున్నాడు. అలా వీధిలో పరిగెత్తుకుని వెళుతోంది ఆ జంట. ఇంట్లో పెద్దల్ని కాదని పెళ్లికి సిద్ధమయ్యే లవ్ స్టోరీనా? అన్నది తెరపై చూడాల్సిందే. మొత్తానికి టీజ‌ర్‌తోనే శేఖ‌ర్ క‌మ్ముల భారీ అంచ‌నాలు పెంచేశాడు. చూస్తుంటే.. మ‌రో భారీ హిట్ కొట్టేలా క‌నిపిస్తున్నాడు.