Viral Video : అభిమాని చేసిన ప‌నికి పాటను మధ్యలో ఆపేసిన హీరో.. దండం పెట్టి మ‌రీ ఓ మంచి మాట చెప్పాడు..!
ఆయుష్మాన్ ఖురానా తన నటనతో మాత్రమే కాకుండా తన గాన నైపుణ్యంతో కూడా చిత్ర‌సీమ‌లో పేరు సంపాదించాడు.
By Medi Samrat Published on 19 Nov 2024 4:21 AM GMT
ఆయుష్మాన్ ఖురానా తన నటనతో మాత్రమే కాకుండా తన గాన నైపుణ్యంతో కూడా చిత్ర‌సీమ‌లో పేరు సంపాదించాడు. ప్రస్తుతం ఆయుష్మాన్ ఖురానా అమెరికా పర్యటనలో ఉన్నాడు. చికాగో, న్యూయార్క్, శాన్ జోస్ వంటి నగరాల్లో ఖురానా తన బ్యాండ్ 'ఆయుష్మాన్ భవ'తో ప్రదర్శనలు ఇస్తున్నాడు. అయితే పర్యటనలో విచిత్ర‌మైన సంఘటన ఒక‌టి చోటుచేసుకుంది.
ఆయుష్మాన్ వేదికపై ప్రదర్శన ఇస్తున్నాడు. ఈ సమయంలో ఒక వింత సంఘటన జరిగింది, దీని కారణంగా ఆయుష్మాన్ తన కచేరీని మధ్యలో ఆపవలసి వచ్చింది. ఈ క్లిప్ సోషల్ మీడియాలో విపరీతంగా వైరల్ అవుతోంది. వేదికపై ఆయుష్మాన్ పాడుతున్న సమయంలో ఓ అభిమాని అతనిపై డాలర్ల వర్షం కురిపించాడు. కచేరీని మధ్యలో ఆపేసిన ఆయుష్మాన్ తన అభిమానిని ఏదైనా స్వచ్ఛంద సంస్థకు విరాళంగా ఇవ్వాలని.. ఇలా వృధా చేయవద్దని కోరాడు. దీంతో ఆయుష్మాన్‌కు చాలా ప్రశంసలు వస్తున్నాయి.
ఒక వ్యక్తి సోషల్ మీడియాలో వీడియోను షేర్ చేస్తూ.. లైవ్ కాన్సర్ట్‌లో ఇలాంటి అగౌరవాన్ని చూడటం నిరాశపరిచింది. ఆయుష్మాన్ ఖురానా NYC కచేరీ సందర్భంగా.. ఆయ‌న పాడుతున్నప్పుడు ఒక అభిమాని వేదికపై డాలర్లను విసిరాడు. ఈ వ్యక్తి సంగీతాన్ని ఆస్వాదించడానికి బదులుగా.. తన సంపదను తప్పుడు మార్గంలో ఇవ్వాలని చూశాడు. ఆ సమయంలో ఆయుష్మాన్ వినయం, సమాధానమిచ్చిన విధానాన్ని అతడు ప్రశంసించాడు.
అమెరికా టూర్‌తో 8 ఏళ్ల తర్వాత ఆయుష్మాన్ మళ్లీ అంతర్జాతీయ వేదికపైకి వచ్చాడు. అతడు చికాగో, న్యూయార్క్, శాన్ జోస్, న్యూజెర్సీ, డల్లాస్‌తో సహా ఐదు నగరాల్లో ప్రదర్శన ఇవ్వనున్నాడు. ఆయుష్మాన్ మాడాక్‌ ఫిలింస్‌ నిర్మిస్తున్న తాజా చిత్రం 'థామ'లో కనిపించనున్నాడు. హారర్, రొమాన్స్‌తో కూడిన ఈ చిత్రం వచ్చే ఏడాది దీపావళి సందర్భంగా విడుదల కానుంది. ఈ చిత్రంలో అతనితో పాటు రష్మిక మందన్న, నవాజుద్దీన్ సిద్ధిఖీ, పరేష్ రావల్ వంటి ఆర్టిస్టులు కనిపించనున్నారు. దినేష్ విజన్, అమర్ కౌశిక్ ద్వయం నిర్మించనున్నారు.
