కేంద్ర‌హోంమంత్రి అమిత్ షాతో భేటీ కానున్న ఎన్టీఆర్

కేంద్ర హోంమంత్రి అమిత్ షా తెలంగాణ ప‌ర్య‌ట‌న‌లో చిన్న మార్పు చోటు చేసుకుంది. యంగ్ టైగ‌ర్ ఎన్టీఆర్‌తో అమిత్ షా భేటీ కానున్నారు. అమిత్ షా ఆహ్వానం మేర‌కు 15 నిమిషాల పాటు ఈ స‌మావేశం జ‌ర‌గ‌నుంది.

ఇటీవ‌ల కేంద్ర హోంమంత్రి అమిత్ షా " ఆర్ఆర్ఆర్ ( రౌద్రం ర‌ణం రుధిరం) " చిత్రాన్ని వీక్షించారు. ఈ చిత్రంలో కొమురం భీమ్‌గా న‌టించిన ఎన్టీఆర్ యాక్టింగ్ చూసి ఫిదా అయ్యారు. ఎన్టీఆర్‌ నటనకు తాను ఇంప్రెస్‌ అయ్యానని, తాను ఎన్టీఆర్‌ను కలవాలనుందని అమిత్ షా తన కోరికను బయట పెట్టిన విషయం తెలిసిందే. ఈ రోజు మునుగోడు స‌భ నేప‌థ్యంలో హైద‌రాబాద్‌లో ఎన్టీఆర్ క‌ల‌వాల‌ని అనుకున్నారు. ఈ క్ర‌మంలో డిన్న‌ర్‌కు ఆహ్వానం పంపించారు. ఈ రోజు సాయంత్రం నోవాటెల్ హోట‌ల్‌లో అమిత్ షాతో ఎన్టీఆర్ క‌ల‌వ‌నున్నారు. ఇదే ఈ సమావేశంలో సినిమాతో పాటు పలు రాజకీయ అంశాలపై కూడా చర్చ జరిగే అవకాశం ఉన్న‌ట్లు తెలుస్తోంది.

అమిత్ షా షెడ్యూల్ ఇదే..

ప్ర‌త్యేక విమానంలో అమిత్ షా మధ్యాహ్నం 2 గంటలకు శంషాబాద్ ఎయిర్ పోర్టుకు రానున్నారు. అక్క‌డ నుంచి ఉజ్జ‌యిని మ‌హంకాళి ఆల‌యానికి చేరుకుని అమ్మ‌వారిని ద‌ర్శించుకుంటారు. 2.40 గంట‌ల‌కు సికింద్రాబాద్‌లోని బీజేపీ కార్య‌క‌ర్త ఇంటికి వెళ్తారు. 3.20 గంట‌ల‌కు బేగంపేట‌లోని ఓ ప్రైవేటు హోట‌ల్‌లో రైతు నేల‌తో స‌మావేశ‌మ‌వుతారు. సాయంత్రం 4.40 గంట‌ల‌కు మునుగోడులో సీఆర్ఫీఎప్ అధికారుల‌తో స‌మావేశం అవుతారు. అనంత‌రం 5 గంట‌ల‌కు మునుగోడులో జ‌రిగే బ‌హిరంగ స‌భ‌లో అమిత్ షా పాల్గొంటారు. స‌భ అనంత‌రం హైద‌రాబాద్‌కు వ‌చ్చి ముఖ్య నాయ‌కుల‌తో గంట‌కు పైగా ప్ర‌త్యేకంగా భేటీ కానున్నారు. రాత్రి 9.40 గంట‌ల‌కు తిరిగి ఢిల్లీకి వెళ్ల‌నున్నారు అమిత్ షా.