గేట్ 2022 పరీక్షల‌ షెడ్యూల్ విడుదల

గ్రాడ్యుయేట్ ఆప్టిట్యూడ్ టెస్ట్ ఇన్ ఇంజనీరింగ్(గేట్)-2022 ప‌రీక్షల‌ షెడ్యూల్ విడుద‌లైంది. ఇంజినీరింగ్ విద్య‌లో పీజీ ప్ర‌వేశాల కోసం ప్ర‌తి సంవ‌త్స‌రం గేట్ ప‌రీక్ష‌ను నిర్వ‌హిస్తుంటారు. గేట్ ప‌రీక్ష‌లో సాధించిన స్కోర్ ఆధారంగా ప్ర‌తిష్టాత్మ‌క ఐఐటీ, ఎన్ఐటీల‌తో పాటు దేశవ్యాప్తంగా వివిధ ప్ర‌భుత్వ‌, ప్రైవేటు క‌ళాశాల్లో ఎంటెక్ /ఎంఈల‌లో ప్ర‌వేశాలు పొంద‌వ‌చ్చు. పబ్లిక్​ సెక్టార్​ అండర్​టేకింగ్​(పీఎస్​యూ)లు సైతం గేట్​ స్కోర్​ను ప్రామాణికంగా తీసుకొని నియామకాలు చేపడుతున్నాయి. ఈ సారి గేట్ ప‌రీక్ష‌ను ఐఐటీ ఖర‌గ్‌పూర్ నిర్వ‌హిస్తోంది.

2022 ఫిబ్రవ‌రి 5 నుంచి 13 వ‌ర‌కు దేశ వ్యాప్తంగా ప‌లు న‌గ‌రాలు, పట్ట‌ణాల్లో ఈ పరీక్ష‌ను నిర్వ‌హించ‌నున్నారు. జ‌న‌వ‌రి 3వ తేదీ నుంచి అడ్మిట్ కార్డులను www.gate.iitkgp.ac.in నుంచి డౌన్​లోడ్​ చేసుకోవ‌చ్చు. అభ్యర్థులు పరీక్ష రోజు వరకు అడ్మిట్ కార్డ్‌లను డౌన్‌లోడ్ చేసుకోవచ్చు. హాల్ టికెట్ హార్డ్ కాపీని పరీక్షా కేంద్రానికి తీసుకెళ్లాల్సి ఉంటుంది. కంప్యూటర్​ బేస్డ్ టెస్ట్​ (సీబీటీ) ప‌ద్ద‌తిలో ప‌రీక్ష‌లు నిర్వ‌హించ‌నున్నారు. రెండు సెషన్లలో ప‌రీక్ష జరుగుతుంది. మొదటి సెషన్​ ఉదయం 9 నుంచి మధ్యాహ్నం 12 గంటల వరకు, రెండో సెషన్ మధ్యాహ్నం 2:30 నుంచి సాయంత్రం 5:30 వరకు ఉంటుంది. మార్చి 17 వ తేదీన ఫలితాలు విడుదల కానున్నాయి.

ఇదిలా ఉంటే.. ఈ సారి కొత్తగా రెండు పేపర్లను ప్రవేశపెట్టారు. గతంలో మొత్తం 27 బ్రాంచ్​లకు పరీక్ష నిర్వహిస్తుండగా.. ఇప్ప‌టి నుంచి 29 బ్రాంచ్​లకు పరీక్ష నిర్వహిస్తారు. ఈసారి జియోమాటిక్స్ ఇంజనీరింగ్ (జీఈ), నేవల్ ఆర్కిటెక్చర్ అండ్​ మెరైన్ ఇంజనీరింగ్ (ఎన్​ఎం) అనే రెండు కొత్త పేపర్లను ప్రవేశపెట్టారు. నౌకానిర్మాణ పరిశ్రమలు, జియో- ఇన్ఫర్మేటిక్స్ కోర్సులు పూర్తి చేసిన గ్రాడ్యుయేట్లకు ఉద్యోగ అవకాశాలు పెరగడంతో ఈ బ్రాంచుల్లో కూడా గేట్ ఎగ్జామ్ నిర్వ‌హిస్తున్నారు.