మంత్రగత్తె అనే నెపంతో.. వృద్ధురాలిని చెట్టుకు కట్టేసి, బట్టలు విప్పి

జార్ఖండ్‌లోని సాహిబ్‌గంజ్‌ జిల్లాలో అమానవీయ ఘటన వెలుగు చూసింది. కొందరు వ్యక్తులు మంత్రగత్తె అని ముద్ర వేసి 60 ఏళ్ల వృద్ధురాలిని బట్టలు విప్పి చెట్టుకు కట్టివేసినట్లు పోలీసులు గురువారం తెలిపారు. రాజధాని రాంచీకి 385 కిలోమీటర్ల దూరంలో ఉన్న బర్హైత్ పోలీస్ స్టేషన్‌లో మహిళ ఫిర్యాదు మేరకు ముగ్గురిపై ఎఫ్ఐఆర్ నమోదు చేసినట్లు పోలీసులు తెలిపారు. అదే సమయంలో నిందితుడికి రూ.21వేలు చెల్లించాలనే షరతుతో తనను విడుదల చేసినట్లు వృద్ధ మహిళ పోలీసులకు తెలిపింది.

బర్హైత్ పోలీస్ స్టేషన్ ఇన్‌ఛార్జ్ గౌరవ్ కుమార్ మాట్లాడుతూ.. "బాధితురాలు వాంగ్మూలం ప్రకారం సంఘటన 20 రోజుల క్రితం జరిగింది. దానిని గ్రామ పంచాయతీ పరిష్కరించింది. అయితే ఆమె ఫిర్యాదు మేరకు ముగ్గురిపై ఎఫ్ఐఆర్ నమోదు చేశాం." అని చెప్పారు. నిందితులు గ్రామం విడిచి వెళ్లిపోయారని, వారిని పట్టుకునేందుకు గాలింపు చర్యలు కొనసాగుతున్నాయని కుమార్ తెలిపారు. "మేము ఈ విషయాన్ని మరింత లోతుగా తెలుసుకునేందుకు కొంతమంది గ్రామస్థులను విచారిస్తున్నాము. నిందితులు, బాధితురాలు ఇరుగుపొరుగు వారని, వారికి అంతర్గత విభేదాలు ఉన్నాయని గ్రామస్థులలోని ఒక వర్గం వారు చెప్పారు. బాధితురాలి నుండి 21,000 రూపాయలు తీసుకున్నట్లు వారు చెప్పారు" అని అతను చెప్పాడు.