కెమెరా కొనడానికి డబ్బుల్లేక.. బర్త్‌డే పార్టీ పేరుతో ఫొటోగ్రాఫర్‌పై పక్కా స్కెచ్‌.. చివరికి..

భోపాల్‌కు చెందిన ఓ ఫోటోగ్రాఫర్‌ను.. నగరంలో 19 ఏళ్ల యువతి బర్త్‌డే పార్టీ షూటింగ్ సాకుతో ఫోన్ చేసి అతని వద్ద ఉన్న రూ.16 లక్షల విలువైన వస్తువులను దోచుకెళ్లారు. ఈ కేసులో ప్రమేయం ఉన్న యువతి, ఆమె ప్రియుడితో పాటు ఇతర సహచరులను పోలీసులు అదుపులోకి తీసుకున్నారు. జనవరి 12న యువతి జాంకీ నుంచి అజయ్ కుష్వాహకు కాల్ వచ్చిందని, ఆమె బర్త్ డే పార్టీ చిత్రాలు, వీడియోలను క్యాప్చర్ చేయాల్సిందిగా కోరినట్లు పోలీసులు తెలిపారు. అయితే జాంకీ మళ్లీ అతడికి ఫోన్ చేసి సమీపంలోని పెట్రోల్ పంపు వద్దకు రమ్మని చెప్పింది.

సంఘటనా స్థలానికి చేరుకోగానే, ఆ యువతి ప్రియుడు అనికేత్, అతని స్నేహితులు ఖలీద్ ఖాన్, అనిల్, బంటీ, రాజేష్‌లు.. అజయ్‌ కుష్వాహాకు చెందిన కెమెరా, ఫోన్, ఫోటోగ్రఫీ పరికరాలు, అతని మోటార్ సైకిల్‌ను దొంగిలించారు. దోపిడీ ఘటన సీసీ కెమెరాల్లో రికార్డ్‌ అయ్యింది. సీసీటీవీ ఫుటేజీ పోలీసుల దర్యాప్తులో ప్రాథమిక క్లూగా ఉపయోగపడింది. అలాగే చోరీకి గురైన వస్తువులను సోమవారం విక్రయించాలని నిందితులు ప్లాన్ చేసినట్లు తెలిసింది.

పోలీసులు తదనంతరం.. అనుమానితుల మార్గంలో ఆకస్మికంగా తనిఖీలు చేసి కారు, దొంగిలించిన వస్తువులను స్వాధీనం చేసుకున్నారు. ఇంటరాగేషన్ సమయంలో, అనికేత్ తాను కూడా ఫోటోగ్రాఫర్ కావాలని ఆకాంక్షిస్తున్నానని, అయితే ప్రొఫెషనల్ కెమెరా కొనడానికి నిధులు లేవని వెల్లడించాడు. ఫలితంగా, అతను కుష్వాహాను దోచుకోవడానికి జాంకీతో కలిసి పథకం రూపొందించాడు.