ప్రియురాలు పెళ్లి పత్రిక, కొత్త చీర చూపించడంతో.. ప్రియుడు ఆత్మహత్య

బెంగళూరులో శనివారం నాడు విషాద సంఘటన జరిగింది. తాను ప్రేమిస్తున్న అమ్మాయికి మరో వ్యక్తితో నిశ్చితార్థం జరిగిందని తెలుసుకున్న 26 ఏళ్ల వ్యక్తి ఆత్మహత్య చేసుకున్నాడు. కిరణ్ గా గుర్తించబడిన ఆ వ్యక్తి బాడీబిల్డర్. స్థానిక జిమ్‌లో ట్రైనర్‌గా పనిచేస్తున్నాడు. పోలీసులు తెలిపిన వివరాల ప్రకారం, అతను దాదాపు మూడు సంవత్సరాలుగా ఆ మహిళతో సంబంధంలో ఉన్నాడు. ఇటీవల ఆమె తన వివాహం నిశ్చయమైందని చెప్పడంతో అతను చాలా బాధపడ్డాడు. ఆమె తన కొత్త చీరతో పాటు వివాహ ఆహ్వాన పత్రికను అతనికి చూపించింది.

కిరణ్ ఇంటికి తిరిగి వచ్చి తన గదిలోకి తాళం వేసుకుని ఈ దారుణమైన చర్య తీసుకున్నాడని పోలీసులు తెలిపారు. అతని కుటుంబ సభ్యులు తలుపులు పగలగొట్టి చూసేసరికి అతను స్పందించకపోవడంతో ఈ విషయం వెలుగులోకి వచ్చింది. తరువాత అతన్ని పోస్ట్ మార్టం పరీక్ష కోసం విక్టోరియా ఆసుపత్రికి తరలించారు. కిరణ్ ఆ మహిళ కోసం వాలెంటైన్స్ డే బహుమతిని సిద్ధం చేస్తున్నాడని కుటుంబ సభ్యులు పోలీసులకు తెలిపారు.

అతని తల్లిదండ్రులు మానసికంగా, ఆర్థికంగా దోపిడీకి పాల్పడిందని ఆరోపిస్తూ ఫిర్యాదు చేశారు. ఆమె కుటుంబం తీసుకున్న రూ. 50 లక్షల రుణాన్ని తీర్చడానికి సహాయం చేస్తానని అతను హామీ ఇచ్చాడని ఆరోపించారు. ఈ సంఘటన బెంగళూరులోని మహాలక్ష్మి లేఅవుట్ పోలీస్ స్టేషన్ పరిధిలో జరిగింది. ఈ ఘటనపై కేసు నమోదు చేసిన పోలీసులు తదుపరి దర్యాప్తు జరుపుతున్నారు.