అన్నా యూనివర్సిటీలో దారుణం.. విద్యార్థినిపై లైంగిక దాడి.. చెట్ల పొదల్లోకి లాక్కెళ్లి..

చెన్నైలో దారుణం జరిగింది. అన్నా యూనివర్శిటీలో రెండవ సంవత్సరం చదువుతున్న విద్యార్థినిపై లైంగిక వేధింపులు జరిగాయి. ఆమె స్నేహితుడిపై డిసెంబర్ 25 బుధవారం తెల్లవారుజామున యూనివర్సిటీ క్యాంపస్‌లో ఇద్దరు గుర్తు తెలియని వ్యక్తులు దాడి చేశారు. బాధితురాలు, తన బాయ్‌ఫ్రెండ్‌.. ఇద్దరూ ప్రతిష్టాత్మక సంస్థ విద్యార్థులు. వీరు యూనివర్సిటీ సమీపంలోని చర్చిలో అర్ధరాత్రి క్రిస్మస్ ప్రార్థనలకు హాజరైన తర్వాత విశాలమైన క్యాంపస్‌లోని బహిరంగ ప్రదేశంలో కూర్చున్నారు.

కొందరు వ్యక్తులు వారి వద్దకు చేరుకుని, విద్యార్థిపై దాడి చేసి, మహిళను పొదల్లోకి లాగి, అక్కడ ఆమెపై లైంగిక దాడికి పాల్పడ్డారు. పట్టుకునేలోపే దుండగులు అక్కడి నుంచి పారిపోయారు. చెన్నై నడిబొడ్డున రాష్ట్రంలోని ప్రముఖ విద్యాసంస్థల్లో ఒకటైన ఆవరణలో జరిగిన ఈ ఘటన తమిళనాడు అంతటా దుమారం రేపింది. నిందితులు బయటి వ్యక్తులా లేక యూనివర్సిటీ విద్యార్థులా అనే విషయాన్ని గుర్తించేందుకు పోలీసులు క్యాంపస్ కెమెరాల్లోని సీసీటీవీ ఫుటేజీని పరిశీలిస్తున్నారు.

పోలీసులు కేసు నమోదు చేసి దర్యాప్తు జరుపుతున్నారు. కాగా, ఈ దారుణ ఘటనను అన్నాడీఎంకే ప్రధాన కార్యదర్శి ఎడప్పాడి కె. పళనిస్వామి ఖండించారు. బిజెపి తమిళనాడు రాష్ట్ర అధ్యక్షుడు కె. అన్నామలై కూడా నేరాన్ని ఖండించారు. డిఎంకె నేతృత్వంలోని ప్రభుత్వాన్ని విమర్శించారు, శాంతిభద్రతలు క్షీణించాయని ఆరోపించారు. ఈ ఘటన తమిళనాడులో మహిళల భద్రత మరియు చట్టాల అమలుపై మరోసారి ఆందోళనలను తెరపైకి తెచ్చింది.