పికప్ వాహనం బోల్తా.. 18 మంది దుర్మరణం

ఛత్తీస్‌గఢ్‌లోని కవార్ధా ప్రాంతంలో సోమవారం పికప్ వాహనం బోల్తా పడిన ఘటనలో 14 మంది మహిళలు సహా 18 మంది మృతి చెందారు. మరో నలుగురికి గాయాలైనట్లు పోలీసులు సోమవారం తెలిపారు. గాయపడిన వారిని చికిత్స నిమిత్తం ఆస్పత్రికి తరలించినట్లు వారు తెలిపారు. బైగా గిరిజన సమాజానికి చెందిన 25-30 మంది వ్యక్తులు సాంప్రదాయ టెండు ఆకుల సేకరణ తర్వాత పికప్ ట్రక్కులో తిరిగి వస్తుండగా ఈ ప్రమాదం చోటు చేసుకుంది.

కుక్‌దూర్‌ పోలీస్‌ స్టేషన్‌ పరిధిలోని బహపానీ ప్రాంతం సమీపంలో వాహనం 20 అడుగుల లోతైన గుంతలో పడిపోయింది. అప్రమత్తమైన తర్వాత, పోలీసు బృందం సంఘటనా స్థలానికి చేరుకుని సహాయక చర్యలు ప్రారంభించిందని పిటిఐ నివేదించింది. క్షతగాత్రులను తదుపరి చికిత్స నిమిత్తం సమీపంలోని జిల్లా ఆసుపత్రికి తరలించారు. అందరూ కుయ్ నివాసితులు అని చెప్పారు. బైగా కమ్యూనిటీ బీడీ తయారీ వ్యాపారం చేస్తుంటారు. దీని కోసం వారు టెండు ఆకులను సేకరిస్తారు. టెండు ఆకులు మార్చి నెలలో చెట్టు నుండి బయటకు వస్తాయి. మేలో సేకరిస్తారు. ఈ ఆకులను బీడీలు చుట్టడానికి ఉపయోగిస్తారు.