ఇప్పుడు ప్రపంచాన్ని వణికిస్తోన్న కరోనా వైరస్ ను 2013లోనే గుర్తించారా ? గుర్తిస్తే..అప్పుడే ఎందుకు మందు కనిపెట్టలేదు ? సార్స్ కుటుంబానికే ఈ వైరస్ చెందిందని ఇప్పుడు గుర్తించిన శాస్త్రవేత్తలు..2013లో వ్యాక్సిన్ కనిపెట్టడంలో ఎందుకు అలసత్వం వహించారు ? ప్రస్తుతం ఈ విషయంపై అందరిలోనూ అనుమానాలు, విమర్శలు వ్యక్తమవుతున్నాయి. ప్రపంచం మొత్తానికి వైరస్ వ్యాపిస్తే గానీ..దాని తీవ్రత ఏంటో అర్థం కాలేదా ? అన్న ప్రశ్నలకు సమాధానాలు లేవు.

Also Read : ఐసోలేషన్ వార్డులుగా రైలు బోగీలు

2013లోనే కరోనా వైరస్ ను గుర్తించారనడానికి అద్దం పడుతోంది అప్పట్లో ఈనాడులో ప్రచురితమైన కథనం. 2013, ఫిబ్రవరి 20వ తేదీన ‘కరోనా కల‌వరం:ఆరుకు చేరిన మృతులు’ అనే హెడ్ లైన్ తో ఈనాడు మెయిన్ ఎడిషన్ లోని ఒకపేజీలో వార్త ప్రచురితమైంది. ఈ వార్త సారాంశం ఏమిటంటే.. ” సార్స్‌ తరహా ల‌క్షణాల‌తో వేధిస్తున్న కొత్తరకం వైరస్‌, ‘నోవెల్‌ కరోనావైరస్‌’కు బ్రిటన్‌లో ఒకరు మృతి చెందారని, బర్మింగ్‌హామ్‌లోని క్వీన్‌ ఎలిజిబెత్‌ ఆస్పత్రిలో చికిత్సపొందుతున్న రోగి మరణించారని పేర్కొంది. గతేడాది మధ్య తూర్పు ప్రాంతంలో బయటపడిన ఈ కొత్తరకం వైరస్‌ బారిన పన్నెండు మంది పడ్డారని, వారిలో ఆరుగురు మృతి చెందారని తెలిపింది. ఈ కొత్త రకం వైరస్ వ‌ల్ల‌ ప్రజానీకానికి ఎక్కువ ముప్పు పొంచి ఉందని, సాధారణ జలుబు, సార్స్‌, తీవ్రస్థాయి శ్వాసకోశ రుగ్మతలు దీని ల‌క్షణాని పేర్కొంది. ఈ వైరస్‌ ఊపిరితిత్తుల‌ మార్గాల‌ పొరల్లోకి చొచ్చుకెళ్లి, రోగ నిరోధక వ్యవస్థపైదాడి చేస్తుందని, ఇది మానవ కణాల్లో సమర్థంగా పెరుగుతున్నట్లు స్విట్జర్లాండ్‌లోని కాంటోనల్‌ ఆసుపత్రి పరిశోధకులు వోల్కెర్‌ ధీల్‌ పేర్కొన్నారని తెలిపింది.”

2013 Eenadu Paper Clip

Also Read : కన్నీటిని తెప్పించే కరోనా కథ.. ఈ కథ వెనుక మరో కథ

ఏడేళ్ల క్రితమే కరోనా వైరస్ బయటపడగా..ఇప్పుడు చైనా వారి వల్లే ఇది ప్రపంచానికి విస్తరించిందన్న వాదనలొస్తున్నాయి. చైనాలోని గబ్బిలాలకు ఈ వైరస్ ఉండగా..ఆ గబ్బిలాలను తిన్న పాముల్ని చైనా ప్రజలు తినడం వల్ల వైరస్ వచ్చిందన్నది ఇప్పుడున్న వాదన. అదే నిజమైతే ఏడేళ్ల క్రితం కరోనా వైరస్ ఎలా బయటపడింది ? అయితే అప్పట్లో ఈ వైరస్ ప్రభావం చాలా తక్కువగా ఉండటం వల్ల దీని గురించి పెద్దగా ఎవరూ పట్టించుకోకపోవడమే అసలు తప్పు. అప్పుడు చేసిన నిర్లక్ష్యమే ఇప్పుడు ప్రపంచ దేశాల్ని పట్టి పీడిస్తోంది. అప్పుడే ఈ వైరస్ కు వ్యాక్సిన్ ను కనుగొని ఉంటే..ఇప్పుడు ఈ వైరస్ వల్ల ఇన్ని వేల మంది ప్రాణాలు పోయేవి కాదు..లక్షల సంఖ్యలో బాధితులు ఆస్పత్రుల పాలయ్యేవారు కాదు. ఏదేమైనా చేతులు కాలాక ఆకులు పట్టుకుంటే ఏం ప్రయోజనముంటుంది చెప్పండి..

రాణి యార్లగడ్డ

నాపేరు యార్లగడ్డ నాగరాణి. నేను న్యూస్ మీటర్ తెలుగులో జర్నలిస్ట్ గా పనిచేస్తున్నాను. గతంలో నేను ఆంధ్రప్రభ, సీవీఆర్ న్యూస్ ఛానెల్ లో మూడున్నరేళ్లు పనిచేశాను. జర్నలిజం పట్ల నాకు ఉన్న ఇష్టం, ఆసక్తితో నేను ఈ వృత్తిని ఎంచుకున్నాను.