మొబైల్ యూజర్లకు ట్రాయ్ తీపి కబురు.. తగ్గనున్న రీఛార్జ్‌ ధరలు!

మొబైల్ రీఛార్జ్ ప్లాన్లలో డేటా అవసరం లేని వినియోగదారుల కోసం ట్రాయ్ (TRAI) సరికొత్త నిబంధనలను ప్రతిపాదించింది. సాధారణంగా ప్రస్తుతం టెలికాం కంపెనీలు అందిస్తున్న ప్లాన్లలో వాయిస్ కాల్స్, ఎస్ఎంఎస్‌లతో పాటు డేటా కూడా కలిపి ఉంటుంది. అయితే, చాలా మంది వినియోగదారులు తమకు డేటా అవసరం లేదని, కేవలం తక్కువ ధరలో కాల్స్ మరియు ఎస్ఎంఎస్ ప్యాక్‌లు కావాలని కోరుతున్నారు. దీనిని దృష్టిలో ఉంచుకుని, ప్రతి టెలికాం సంస్థ కనీసం ఒక ప్రత్యేక టారిఫ్ వోచర్ (STV)ను కేవలం వాయిస్ మరియు ఎస్ఎంఎస్ కోసం మాత్రమే అందించాలని గతంలోనే ఆదేశించింది.

అయితే, టెలికాం కంపెనీలు కేవలం కొన్ని ప్లాన్లలోనే ఈ సదుపాయాన్ని కల్పిస్తున్నాయని ట్రాయ్ గుర్తించింది. ముఖ్యంగా తక్కువ కాలపరిమితి (Shorter-duration) కలిగిన వాయిస్ మరియు ఎస్ఎంఎస్ ప్యాక్‌ల లభ్యత చాలా తక్కువగా ఉంది. దీనిపై వినియోగదారుల నుండి అనేక ఫిర్యాదులు అందడంతో, ట్రాయ్ ఇప్పుడు కొత్త నిబంధనను తెరపైకి తెచ్చింది. దీని ప్రకారం, ఒక టెలికాం సంస్థ వాయిస్, ఎస్ఎంఎస్ మరియు డేటాతో కలిపి ఏయే కాలపరిమితితో (ఉదాహరణకు 28 రోజులు, 56 రోజులు, 84 రోజులు) ప్లాన్లను అందిస్తుందో, అదే కాలపరిమితితో కేవలం 'వాయిస్ మరియు ఎస్ఎంఎస్' మాత్రమే ఉండే ప్రత్యేక ప్లాన్లను కూడా తప్పనిసరిగా అందించాలి.

అంతేకాకుండా, డేటా లేని ఈ ప్లాన్ల ధరలు, డేటాతో కూడిన ప్లాన్ల కంటే తక్కువగా ఉండాలని ట్రాయ్ స్పష్టం చేసింది. అంటే డేటాను తొలగించినందుకు అనుపాతంలో ధరను తగ్గించి వినియోగదారులకు అందుబాటులో ఉంచాలి. ఈ ముసాయిదాపై స్టేక్‌హోల్డర్లు మరియు ప్రజలు తమ అభిప్రాయాలను ఈ నెల 28వ తేదీలోపు లిఖితపూర్వకంగా లేదా ఈ-మెయిల్ (fea1-div@trai.gov.in) ద్వారా సమర్పించవచ్చని ట్రాయ్ సూచించింది. ఈ నిర్ణయం అమల్లోకి వస్తే, ఇంటర్నెట్ వాడని సాధారణ మొబైల్ వినియోగదారులకు రీఛార్జ్ భారం గణనీయంగా తగ్గే అవకాశం ఉంది.