బ్యాంకులకు ఆర్బీఐ కీలక ఆదేశాలు

డిజిటల్‌ మోసాలను అరికట్టేందుకు బ్యాంకులు పటిష్ఠ చర్యలు తీసుకోవాలని రిజ్వర్‌ బ్యాంక్‌ ఆఫ్‌ ఇండియా ఆదేశించింది. నష్టాలను తగ్గించుకునేందుకు థర్డ్‌ పార్టీ సర్వీస్‌ ప్రొవైడర్లపై మెరుగైన పర్యవేక్షణ ఉండాలని సూచించింది. అలాగే లిక్విడిటీని పెంచుకునేందుకు సెంట్రల్‌ బ్యాంక్‌ రూ.60 వేల కోట్ల విలువైన ప్రభుత్వ సెక్యూరిటీలు కొనుగోలు చేస్తున్నట్టు తెలిపింది.

భారతీయ రిజర్వ్ బ్యాంక్ గవర్నర్ సంజయ్ మల్హోత్రా పెరుగుతున్న డిజిటల్ మోసాలను హైలెట్‌ చేశారు. ఆర్థిక రంగంలో ఇటువంటి ముప్పులను నివారించడానికి బలమైన, చురుకైన చర్యల యొక్క ప్రాముఖ్యతను నొక్కి చెప్పారు. బాధ్యతలు చేపట్టిన తర్వాత ప్రభుత్వ, ప్రైవేట్ రంగ బ్యాంకుల మేనేజింగ్ డైరెక్టర్లు, సీఈవోలతో తన మొదటి సమావేశంలో, ఐటీ రిస్క్ మేనేజ్‌మెంట్, సైబర్‌ సెక్యూరిటీపై చర్చించారు. సంబంధిత రిస్క్‌లను తగ్గించేందుకు థర్డ్-పార్టీ సర్వీస్ ప్రొవైడర్లపై తమ పర్యవేక్షణను బలోపేతం చేయాలని బ్యాంకులను ఆయన కోరారు.

బలమైన ఆర్థిక వ్యవస్థను నిర్మించడంలో బ్యాంకులు పోషించే ముఖ్యమైన పాత్రను మల్హోత్రా వివరించారు. ఆర్థిక స్థిరత్వాన్ని కొనసాగించాలని, ఆర్థిక చేరికను మరింతగా పెంచాలని, డిజిటల్ అక్షరాస్యతను మెరుగుపరచాలని, క్రెడిట్ లభ్యత, స్థోమతను పెంచాలని, కస్టమర్ సర్వీస్, ఫిర్యాదుల పరిష్కార యంత్రాంగాన్ని బలోపేతం చేయాలని, సాంకేతికతలో పెట్టుబడులు పెట్టాలని ఆర్‌బిఐ గవర్నర్ బ్యాంకులను కోరారు. అంతేకాకుండా, ఆర్‌బిఐ గవర్నర్, ఆర్‌బిఐ, బ్యాంకులు కలిసి పని చేయాల్సిన అవసరాన్ని ఎత్తిచూపారు.