EPFO : శుభ‌వార్త.. ఈపీఎఫ్ వడ్డీ రేటు పెంపు
ఉద్యోగుల ప్రావిడెంట్ ఫండ్ ఆర్గనైజేషన్(EPFO) మంగళవారం శుభ‌వార్త చెప్పింది
By తోట వంశీ కుమార్‌ Published on 28 March 2023 8:00 AM GMT
ఈపీఎఫ్ వడ్డీ రేటు పెంపు
ఉద్యోగుల ప్రావిడెంట్ ఫండ్ ఆర్గనైజేషన్(EPFO) మంగళవారం శుభ‌వార్త చెప్పింది. 2022-23 ఆర్థిక సంవత్సరానికి ఉద్యోగుల ప్రావిడెంట్ ఫండ్ (EPF) డిపాజిట్లపై 8.15% వడ్డీ రేటును నిర్ణయించింది. గ‌త ఆర్థిక సంవ‌త్స‌రంతో పోలిస్తే ఇది కాస్త ఎక్కువ.
ఉద్యోగుల ప్రావిడెంట్ ఫండ్ ఆర్గనైజేషన్ యొక్క అపెక్స్ డెసిషన్ మేకింగ్ బాడీ సెంట్రల్ బోర్డ్ ఆఫ్ ట్రస్టీస్ (CBT) మంగళవారం జరిగిన సమావేశంలో 2022-23 సంవత్సరానికి EPF పై 8.15% వడ్డీ రేటును అందించాలని నిర్ణయించింది. CBT నిర్ణ‌యాన్ని 2022-23కి EPF డిపాజిట్లపై వడ్డీ రేటు సమ్మతి కోసం ఆర్థిక మంత్రిత్వ శాఖకు పంపనుంది.
ప్ర‌భుత్వం నుంచి ఆమోదం వ‌చ్చిన త‌రువాత 5 కోట్ల చందాదారుల ఖాతాల్లో వడ్డీ మొత్తాన్ని జ‌మ చేస్తారు. సీబీటీ ప్ర‌తిపాద‌న‌ల‌పై కేంద్ర ఆర్థిక శాఖ త్వ‌ర‌లోనే నిర్ణ‌యాన్ని తీసుకోనుంది.
మార్చి 2020లో EPFO ప్రావిడెంట్ ఫండ్ డిపాజిట్లపై వడ్డీ రేటును 2018-19కి అందించిన 8.65% నుండి 2019-20కి ఏడేళ్ల కనిష్ట స్థాయి 8.5%కి తగ్గించింది.
EPFO తన చందాదారులకు 2016-17లో 8.65 శాతం మరియు 2017-18లో 8.55 శాతం వడ్డీ రేట్లను అందించింది. 2015-16లో వడ్డీ రేటు కొంచెం ఎక్కువగా 8.8 శాతంగా ఉంది. పదవీ విరమణ నిధి సంస్థ 2013-14 మరియు 2014-15లో 8.75% వడ్డీ రేటును ఇచ్చింది. 2012-13కి 8.5% కంటే ఎక్కువ. 2011-12లో వడ్డీ రేటు 8.25 శాతం.
