క్రెడిట్‌ కార్డ్‌ బిల్‌ మినిమమ్‌ కడుతున్నారా?

క్రెడిట్‌ కార్డ్‌ బిల్‌ కట్టేటప్పుడు కచ్చితంగా మినిమమ్‌ బిల్‌ అని కనబడుతుంది. ఆ తక్కువ మొత్తం ఆకర్షించేలాగే ఉంటుంది. మినిమమ్‌ కట్టి పూర్తి భారం వచ్చే నెలలో చూసుకుందామనుకుంటారు. ఇదే క్రెడిట్‌ కార్డ్‌ హోల్డర్‌ చేసే పెద్ద తప్పని నిపుణులు చెబుతున్నారు. ఎందుకంటే మినిమమ్‌ కట్టిన తర్వాత మరుసటి నెలలో.. కొనుగోలు చేసిన మొదటి రోజు నుంచే వడ్డీ పడుతుంది. ఎప్పటి బిల్‌ అప్పుడే కట్టేస్తే క్రెడిట్ స్కోర్‌ హెల్తీగా ఉంటుంది. డబ్బులు సర్దుబాటు అవ్వకపోతే ఏడాదిలో ఒకట్రెండు సార్లు మినహా మినిమమ్‌ కట్టకపోవడం మేలు. ప్రతి నెలా ఇలాగే కట్టుకుంటూ పోతే.. భారీ వడ్డీతో పీకల్లోతు అప్పుల్లోనే కాకుండా, బ్యాంకులతో మీ సంబంధాలు చెడతాయని గుర్తుంచుకోవాలి. క్రెడిట్‌ కార్డును ఎలా ఉపయోగించాలో, బ్యాంకులు వడ్డీ ఎలా విధిస్తాయో ఇప్పుడు తెలుసుకుందాం..

క్రెడిట్‌ కార్డుపై ఉపయోగించిన మొత్తం బిల్‌ జనరేట్‌ అయ్యాక 5 శాతం మినిమమ్‌ కట్టాల్సి ఉంటుంది. అంటే రూ.10 వేల బిల్లు ఉందనుకుందాం.. మినిమమ్‌ బిల్‌ 5 శాతం రూ.500 కట్టారనుకుంటే.. మిగతా రూ.9,500 మరుసటి నెలలో ట్రాన్స్‌ఫర్‌ అవుతుంది. కానీ మొత్తం రూ.10 వేలుకు బ్యాంకులు, కార్డు సంస్థను బట్టీ వడ్డీ విధిస్తాయి. ఇది 36 నుంచి 48 శాతం వరకు ఉంటుంది. కాబట్టి మినిమమ్‌ కట్టేటప్పుడు దీన్ని పరిగణనలోకి తీసుకుని చెల్లించండి. ఇలాగే కట్టుకుంటూ పోతే ఆ అప్పు అలాగే ఉంటుంది. వడ్డీలు, లేట్‌ ఫీజు ఒకదానికొకటి యాడై అలా పెరుగుతూ దీర్ఘకాలంలో నష్టాన్ని మిగులుస్తాయి.