Vijayawada: ప్లాట్‌ఫారమ్‌పైకి దూసుకొచ్చిన బస్సు.. ముగ్గురు మృతి

విజయవాడలో ఘోర ప్రమాదం చోటు చేసుకుంది. పండిట్ నెహ్రూ బస్టాండ్ వద్ద సోమవారం ఉదయం 12వ నంబర్ ప్లాట్‌ఫారమ్‌పైకి ఎపిఎస్‌ఆర్‌టిసి లగ్జరీ బస్సు దూసుకొచ్చింది. ఈ ఘటనలో బస్సు కండక్టర్‌తో సహా ముగ్గురు వ్యక్తులు మరణించారు. ఈ ఘోర ప్రమాదంతో బస్టాండ్‌లో భయానక వాతావరణం నెలకొంది. బస్సు కండక్టర్‌ను గుంటూరు-2 డిపోకు చెందిన వీరయ్యగా గుర్తించారు. మృతి చెందిన వారిలో బాలుడు కూడా ఉన్నాడు. బ్రేక్‌ ఫెయిల్‌ కావడంతో ఈ ఘటన జరిగినట్లు ఆర్టీసీ అధికారులు తెలిపారు. విజయవాడ నుంచి గుంటూరు వెళ్లాల్సిన ఆర్టీసీ సర్వీస్ బస్సు పండిట్‌ నెహ్రూ బస్టాండ్‌లో ప్రమాదానికి గురైంది. డ్రైవర్ రివర్స్ గేర్ బదులు ఫస్ట్ గేర్ వేయడమే ప్రమాదానికి కారణం అని డిపో ఆర్ఎం చెబుతున్నారు.