జి.కొత్త‌ప‌ల్లిలో ఉద్రిక్త‌త.. ప‌రామ‌ర్శ‌కు వెళ్లిన ఎమ్మెల్యేపై దాడి
MLA Talari Venkatrao Attacked by G Kottapalli villagers.ఏలూరు జిల్లా ద్వార‌కా తిరుమల మండ‌లం జి.కొత్త‌ప‌ల్లిలో ఉద్రిక్త‌త
By తోట వంశీ కుమార్‌ Published on 30 April 2022 5:55 AM GMT
ఏలూరు జిల్లా ద్వార‌కా తిరుమల మండ‌లం జి.కొత్త‌ప‌ల్లిలో ఉద్రిక్త‌త చోటు చేసుకుంది. శ‌నివారం ఉద‌యం జి.కొత్త‌ప‌ల్లిలో వైసీపీ నాయకుడు గంజి ప్రసాద్ దారుణ హ‌త్య‌కు గురైయ్యాడు. విష‌యం తెలుసుకున్న ఎమ్మెల్యే త‌లారి వెంక‌ట్రావ్ బాధిత కుటుంబాన్ని ప‌రామ‌ర్శించేందుకు గ్రామానికి వెళ్లారు. ఈ స‌మ‌యంలో ఎమ్మెల్యేపై కొంద‌రు స్థానికులు దాడి చేసేందుకు య‌త్నించ‌గా.. అప్ర‌మ‌త్త‌మైన పోలీసులు వారిని అడ్డుకున్నారు.
ఎమ్మెల్యేను ర‌క్షించేందుకు య‌త్నించిన పోలీసుల‌పైనా రాళ్లు రువ్విన‌ట్లు తెలుస్తోంది. దీంతో వ‌ల‌యంగా ఏర్ప‌డిన పోలీసులు ఎమ్మెల్యేను అక్క‌డి నుంచి త‌ర‌లించారు. ఈ ఘ‌ట‌న‌లో ఎమ్మెల్యేకు స్వ‌ల్ప గాయాలైన‌ట్లు తెలుస్తోంది. గ్రామంలో ఉద్రిక్త ప‌రిస్థితులు నెల‌కొన‌డంతో భారీగా పోలీసుల‌ను మొహ‌రించారు.
జి.కొత్త‌ప‌ల్లిలో ఇరు వ‌ర్గాల మ‌ధ్య ఆధిప‌త్యంలో గంజి ప్రసాద్ దారుణ హ‌త్య‌కు గురైన‌ట్లు స‌మాచారం. అయితే.. ఎమ్మెల్యే మద్దతు ఓ వర్గానికి ఉండటం వల్లే హత్య జరిగిందంటూ ప్రసాద్ వర్గీయులు ఎమ్మెల్యేపై దాడికి దిగినట్లుగా తెలుస్తోంది. కాగా.. గంజి ప్రసాద్ హ‌త్య‌పై కేసు న‌మోదు చేసిన పోలీసులు ద‌ర్యాప్తు చేప‌ట్టారు.
