యువతకు ఉద్యోగావకాశాలు.. కొత్త ఎంఎస్‌ఎంఈల ఏర్పాటు: మంత్రి శ్రీనివాస్

విజయవాడ: రాష్ట్రంలో ఎంఎస్‌ఎంఈల స్థాపనను పెంచేందుకు సత్వర చర్యలు తీసుకోవాలని, క్షేత్రస్థాయిలో పర్యవేక్షణ పెంచాలని సూక్ష్మ, చిన్న, మధ్య తరహా పరిశ్రమలు, గ్రామీణ పేదరిక నిర్మూలన, ఎన్నారై సాధికారత శాఖ మంత్రి కొండపల్లి శ్రీనివాస్ అన్నారు. అమరావతిలోని వెలగపూడిలోని సచివాలయంలో ఎంఎస్‌ఎంఈ శాఖ పనితీరుపై గురువారం జరిగిన సమీక్షా సమావేశంలో శ్రీనివాస్‌ మాట్లాడుతూ రాష్ట్రాన్ని పెట్టుబడులకు అనుకూలంగా మార్చేందుకు ప్రభుత్వ విధానాలను సరళతరం చేయడంతోపాటు ఎంఎస్‌ఎంఈలను పెంచడం ద్వారా యువతకు ఉద్యోగావకాశాలు కల్పించేందుకు చర్యలు తీసుకోవాలని ఉద్ఘాటించారు.

కేంద్ర ప్రభుత్వ ఆధ్వర్యంలోని ఎంఎస్‌ఎంఈ పథకాలన్నింటినీ వినియోగించుకునేందుకు తీసుకోవాల్సిన చర్యలపై ప్రత్యేక దృష్టి సారించాలని మంత్రి అధికారులను ఆదేశించారు. నిరుద్యోగ సమస్యకు తగిన పరిష్కారం చూపాలని, పారిశ్రామికవేత్తలకు అనుకూల వాతావరణం కల్పించి పెద్ద ఎత్తున పెట్టుబడులను ఆకర్షించాలని అధికారులను కోరారు. ‘ఇంట్లో పారిశ్రామికవేత్త’ నినాదాన్ని క్షేత్రస్థాయిలో అమలు చేసేందుకు తక్షణమే చర్యలు తీసుకోవాలని శ్రీనివాస్ సూచించారు. సమావేశంలో పరిశ్రమల శాఖ కార్యదర్శి ఎన్‌.యువరాజ్‌, ఎంఎస్‌ఎంఈ కార్పొరేషన్‌ మేనేజింగ్‌ డైరెక్టర్‌ నందనీ సలారియా, ఇతర అధికారులు పాల్గొన్నారు.