దిత్వా ఎఫెక్ట్‌.. రెడ్‌ అలర్ట్‌ జారీ.. దక్షిణకోస్తా, రాయలసీమ జిల్లాల్లో అతిభారీ వర్షాలు

అమరావతి: దిత్వా తుఫాను ప్రభావంతో నేడు పలు జిల్లాలకు రాష్ట్ర విపత్తు నిర్వహణ సంస్థ భారీ వర్ష సూచన చేసింది. ప్రకాశం, నెల్లూరు, కడప, అన్నమయ్య, చిత్తూరు, తిరుపతి జిల్లాల్లో భారీ నుంచి అతి భారీ వర్షాలు కురిసే అవకాశం ఉందని తెలిపింది. గుంటూరు, బాపట్ల, పల్నాడు, కర్నూలు, నంద్యాల, అనంతపురం, సత్యసాయి జిల్లాల్లో మోస్తరు నుంచి భారీ.. అనకాపల్లి, కాకినాడ, కోనసీమ, తూర్పు గోదావరి, పశ్చిమ గోదావరి, ఏలూరు, కృష్ణా, ఎన్టీఆర్‌ జిల్లాల్లో మోస్తరు వర్షాలు కురిసే అవకాశం ఉందని పేర్కొంది.

కోస్తాతీరం వెంబడి గంటకు 45-65 కిమీ వేగంతో ఈదురుగాలులు వీస్తాయని తెలిపింది. నెల్లూరు, తిరుపతి జిల్లాల ప్రజలు మరింత జాగ్రత్తగా ఉండాలని తెలిపింది. అత్యవసర సహాయక చర్యల కోసం నెల్లూరు, కడపలో 2 ఎన్డీఆర్ఎఫ్ బృందాలు, వెంకటగిరిలో 3 ఎస్డీఆర్ఎఫ్ బృందాలు, అదనంగా మరో 3 బృందాలు సిద్ధం ఏర్పాటు చేశామని, ప్రజలు అప్రమత్తంగా ఉండాలని విపత్తుల నిర్వహణ సంస్థ ఎండీ ప్రఖర్ జైన్ తెలిపారు.

దిత్వా తుఫాను తీరానికి చేరువవుతున్న సమయంలో తమిళనాడు, పుదుచ్చేరికి వాతావరణ శాఖ రెడ్‌ అలర్ట్‌ ఇచ్చింది. తమిళనాడులోని కడలూరు, నాగపట్నం, మయిలాడుతురై, విల్లుపురం, చెంగల్‌పట్టు జిల్లాలతో పాటు పుదుచ్చేరిలోని కారైకల్‌ ప్రాంతంలో భారీ వర్షాలు పడే ఛాన్స్‌ ఉందని హెచ్చరించింది. పలు ప్రాంతాల్లో ఇప్పటికే గాలులతో కూడిన వర్షం మొదలు కాగా నెల్లూరు జిల్లాలో శనివారం ఓ మోస్తరు వాన కురిసిందని అధికారులు తెలిపారు.