తెలుగు రాష్ట్రాల విభజన స‌మ‌స్య‌ల‌పై 17న కీల‌క స‌మావేశం.. అజెండాలో ఏపీ ప్రత్యేక హోదా అంశం
Central Government Meeting on AP And Telangana Issues.తెలుగు రాష్ట్రాల విభజన అనంత‌రం పరిష్కారం కాని
By తోట వంశీ కుమార్‌ Published on 12 Feb 2022 7:05 AM GMT
తెలుగు రాష్ట్రాల విభజన అనంత‌రం పరిష్కారం కాని స‌మ‌స్య‌ల‌పై కేంద్ర ప్ర‌భుత్వం దృష్టిసారించింది. ఈ నేప‌థ్యంలోనే కేంద్ర హోంశాఖ కీల‌క స‌మావేశాన్ని ఏర్పాటు చేయ‌బోతుంది. కేంద్ర హోంశాఖ సంయుక్త కార్య‌ద‌ర్శి నేతృత్వంలోని కమిటీ ఈ స‌మావేశం నిర్వ‌హించ‌నుంది. ఈ నెల 17న ఉదయం 11 గంటల‌కు కమిటీ తొలి భేటీ నిర్వహిస్తామ‌ని కేంద్ర ప్ర‌భుత్వం ప్ర‌క‌టించింది. వీడియో కాన్ఫ‌రెన్స్ ద్వారా ఈ స‌మావేశం జ‌ర‌గ‌నుంది. స‌మావేశ అజెండాలో ప్రత్యేక హోదా అంశం కూడా ఉండ‌డం గ‌మ‌నార్హం.
కాగా.. విభజన స‌మ‌స్య‌ల‌పై చ‌ర్చించేందుకు ఈ నెల 8న జరిగిన సమావేశంలో కేంద్ర హోం శాఖ కమిటీ ఏర్పాటు చేసింది. కేంద్ర హోంశాఖ జాయింట్ సెక్ర‌ట‌రీ ఆశిష్ కుమార్‌, తెలంగాణ నుంచి రామకృష్ణారావు, ఆంధ్ర‌ప్ర‌దేశ్‌ నుంచి ఎస్‌ఎస్ రావత్ లు ఈ క‌మిటీలో స‌భ్యులుగా ఉన్నారు.
త్రిసభ్య కమిటి ఎజెండాలోని అంశాలు
1. ఏపీ స్టేట్ ఫైనాన్స్‌ కార్పొరేషన్ విభజన
2.ఏపీ - తెలంగాణ మధ్య వినియోగ సమస్యపై పరిష్కారం
3.పన్ను అంశాలపై తలెత్తిన వివాదాల పరిష్కారం
4.రాష్ట్రాలకు సంబంధించిన బ్యాంకులో ఉన్న నగదు, డిపాజిట్లు
5. APSCSCL, TSCSCL మధ్య నగదు ఖాతాల విభజన
6 ఏపీ - తెలంగాణ మధ్య వివిధ వనరుల పంపిణీ
7.ఉత్తరాంధ్ర, రాయలసీమ వెనుకబడిన 7 జిల్లాల ప్రత్యేక గ్రాంటు
8.ఆంధ్రప్రదేశ్‌కు ప్రత్యేక హోదా
9. రెండు రాష్ట్రాలకు సంబంధించిన పన్ను రాయితీలు
