AndhraPradesh: సాయంత్రం 5 గంటల వరకు 68 శాతం ఓటింగ్‌ నమోదు

అమరావతి: ఆంధ్రప్రదేశ్‌లోని 25 లోక్‌సభ, 175 అసెంబ్లీ నియోజకవర్గాల్లో సోమవారం సాయంత్రం 5 గంటల వరకు దాదాపు 68 శాతం ఓటింగ్ నమోదైనట్లు ఎన్నికల సంఘం వెల్లడించింది. అత్యధిక ఓటింగ్ శాతం డాక్టర్ బిఆర్ అంబేద్కర్ కోనసీమ జిల్లాలో 73.55%, అత్యల్పంగా అల్లూరి సీతారామరాజు జిల్లాలో 55.17% నమోదైంది. తెనాలి, మాచర్ల, అనంతపురంలో అధికార వైఎస్సార్‌సీపీ, ప్రతిపక్షాల మధ్య జరిగిన ఘర్షణలను సీరియస్‌గా తీసుకున్న ప్రధాన ఎన్నికల అధికారి (సీఈఓ) ముఖేష్‌ కుమార్‌ మీనా, కేసులు నమోదు చేయడంతోపాటు అవసరమైన చోట గృహనిర్బంధం చేయాలని అధికారులను ఆదేశించారు.

పుంగనూరులో టీడీపీ ఏజెంట్ల అపహరణకు పాల్పడిన నిందితులను తప్పించుకునేందుకు సహకరించిన పోలీసు అధికారిని సస్పెండ్ చేయాలని సీఈవో ఆదేశించినట్లు ఆయన కార్యాలయం నుంచి ఒక పత్రికా ప్రకటన తెలిపింది. గుంటూరు జిల్లా తెనాలిలో వైఎస్సార్‌సీపీ ఎమ్మెల్యే శివకుమార్‌కు, ఓటరుకు మధ్య జరిగిన గొడవకు సంబంధించి గుంటూరు జిల్లా తెనాలి పోలీసులు సంబంధిత సెక్షన్ల కింద కేసు నమోదు చేశారు.

శివ కుమార్ క్యూలో వెళ్లలేదని, ఓటరు ప్రశ్నించడంతో ఈ ఘటన జరిగింది. ఈ క్రమంలోనే ఆవేశంతో, శాసనసభ్యుడు ఆ వ్యక్తిని చెంపదెబ్బ కొట్టాడు. ఓటర్‌ కూడా రివర్స్‌లో కొట్టాడు. ఉదయం 7 గంటలకు ప్రారంభమైన పోలింగ్ సాయంత్రం 6 గంటలకు ముగిసింది. తొలివిడత ఓటు వేసిన వారిలో గవర్నర్‌ ఎస్‌ అబ్దుల్‌ నజీర్‌, ముఖ్యమంత్రి వైఎస్‌ జగన్‌ మోహన్‌రెడ్డి, టీడీపీ అధినేత చంద్రబాబు నాయుడు, వారి కుటుంబ సభ్యులు ఉన్నారు.

ఆంధ్రప్రదేశ్ కాంగ్రెస్ కమిటీ (ఏపీసీసీ) అధ్యక్షురాలు వైఎస్ షర్మిల తన తండ్రి, మాజీ ముఖ్యమంత్రి వైఎస్ రాజశేఖర్ రెడ్డి సమాధిని సందర్శించి ముందుగా ఇడుపులుపాయలో ఓటు వేశారు. రాష్ట్రంలోని మొత్తం 175 అసెంబ్లీ స్థానాలు, 25 లోక్‌సభ స్థానాల్లో వైఎస్సార్‌సీపీ పోటీ చేస్తోంది.