Video: పార్కులో ముస్లిం అమ్మాయి, హిందూ అబ్బాయిని వేధించిన వ్యక్తి.. 'బుర్ఖా తీసేయ్‌' అంటూ..

బెంగళూరులో జరిగిన ఓ మోరల్‌ పోలీసింగ్ వీడియో ఆన్‌లైన్‌లో వైరల్ అయింది. వీడియోలో ఒక పార్కులో గుర్తు తెలియని వ్యక్తి ఒక ముస్లిం అమ్మాయిని, హిందూ అబ్బాయిని వేధిస్తున్నట్లు కనబడింది. ఆ వీడియోలో, ఆ వ్యక్తి ఆ జంటను వీడియో తీసి వారి సంబంధాన్ని ప్రశ్నించాడు. అతను ఆ అమ్మాయిని తన బుర్ఖాను తీసేయమని, అవి "ముస్లిం దుస్తులు" అని చెప్పాడు. ఆమె పేరు చెప్పమని అడిగాడు. ముస్లిం అమ్మాయితో ఎలా డేటింగ్ చేయగలవని అతను ఆ అబ్బాయిని ప్రశ్నిస్తాంచాడు.

ఆ అమ్మాయి అతన్ని ఆపమని వేడుకున్నప్పటికీ, ఆ వ్యక్తి వారిని బెదిరిస్తూనే వచ్చాడు. వారిని ఎదుర్కోవడానికి ఒక గుంపు వ్యక్తులు వస్తున్నారని చెప్పాడు. అతను ఆ అమ్మాయితో, “కమ్యూనిటీ సభ్యులు వస్తున్నారు, ఇక్కడే ఉండు” అని అన్నాడు. అయితే ఈ సంఘటన జరిగిన సమయం, ప్రదేశం ఇంకా తెలియదు. ఈ వీడియోను సోషల్ మీడియా ప్లాట్‌ఫామ్ ఎక్స్‌లో పోస్ట్ చేసి బెంగళూరు పోలీస్ కమిషనర్‌కు ట్యాగ్ చేశారు. ఈ విషయాన్ని తాము పరిశీలిస్తున్నామని పోలీసులు చెబుతున్నారు.

కొన్ని రోజుల క్రితం, ఏప్రిల్ 11 సాయంత్రం, బెంగళూరులోని సువర్ణ లేఅవుట్‌లో ఇలాంటి మోరల్‌ పోలీసింగ్ కేసు జరిగింది . క్లాస్‌మేట్స్ అయిన ఒక హిందూ అబ్బాయి, బురఖా ధరించిన మరొక అమ్మాయి ఒక పబ్లిక్ పార్కులో బైక్‌పై కలిసి కూర్చుండగా, ఒక మైనర్‌తో సహా ఐదుగురు ముస్లిం పురుషులు వారి వద్దకు వచ్చారు. ఆమె హిందూ అబ్బాయితో ఎందుకు ఉందని ఆ వ్యక్తులు ప్రశ్నించి, ఆమె కుటుంబ సభ్యుల వివరాలను అడిగారు. ఆమె వాటిని పంచుకోవడానికి నిరాకరించడంతో, ఆ బృందం ఆ అబ్బాయిపై దాడి చేయడానికి ప్రయత్నించిందని ఆరోపించారు. వారు ఆ జంటను చిత్రీకరించి వీడియోను సోషల్ మీడియాలో షేర్ చేశారు. బాలిక ఫిర్యాదు చేయడంతో, చంద్ర లేఅవుట్ పోలీస్ స్టేషన్ పోలీసులు ఐదుగురు నిందితులను అరెస్టు చేశారు. రెండు కేసులను దర్యాప్తు చేస్తున్న పోలీసులు చర్యలు తీసుకుంటామని హామీ ఇచ్చారు.