'ఆరోగ్య మహిళ'.. ప్రతి మంగళవారం ప్రత్యేక వైద్య పరీక్షలు
ప్రతి మహిళ ఆరోగ్యంతో ఉండాలనే లక్ష్యంతో ఆరోగ్య మహిళ కార్యక్రమానికి తెలంగాణ ప్ర‌భుత్వం శ్రీకారం చుట్టింది
By తోట వంశీ కుమార్‌ Published on 5 March 2023 6:26 AM GMT
మ‌హిళ‌ల కోసం ఇప్ప‌టికే ఎన్నో కార్య‌క్ర‌మాల‌ను చేప‌ట్టింది తెలంగాణ ప్ర‌భుత్వం. అంతర్జాతీయ మహిళా దినోత‌వ్సం సందర్భంగా ప్రతి మహిళ ఆరోగ్యంతో ఉండాలనే లక్ష్యంతో ఆరోగ్య మహిళ కార్యక్రమానికి శ్రీకారం చుట్ట‌నుంది. దీని ద్వారా మ‌హిళ‌లు ప్ర‌ధానంగా ఎదుర్కొనే 8 రకాల ఆరోగ్య స‌మ‌స్య‌ల‌కు వైద్యం అందించ‌నున్నారు. ఈ కార్యక్రమాన్ని అంతర్జాతీయ మహిళా దినోత్సవం సందర్భంగా ఈ నెల 8 నుంచి ప్రారంభించ‌నున్న‌ట్లు ఆర్థిక, వైద్య ఆరోగ్య శాఖ మంత్రి హరీశ్ రావు తెలిపారు.
హైదరాబాద్‌లోని బీఆర్కే భవన్‌లో మంత్రి ఎర్రబెల్లి దయాకర్‌రావుతో కలిసి మంత్రి హరీశ్ రావ్ ఈ పథకంపై ఉన్నతస్థాయి సమీక్షా సమావేశం నిర్వహించారు. సీఎం కేసీఆర్‌ ఆదేశాల మేరకు ‘ఆరోగ్య మహిళ’ కార్యక్రమానికి చేప‌డుతున్న‌ట్లు తెలిపారు. ఈ కార్యక్రమాన్ని విజయవంతం చేయాలని అధికారులను ఆదేశించారు. ప్రతి మంగళవారం మహిళలకు ప్రత్యేక వైద్య పరీక్షలు నిర్వహించాలన్నారు.
8 రకాల పరీక్షలు ఇవే..
- మధుమేహం, రక్తపోటు, రక్తహీనత, ఇతర సాధారణ పరీక్షలు
- ఓరల్‌, సర్వైకల్‌, రొమ్ము క్యాన్సర్ల స్రీనింగ్‌
- థైరాయిడ్‌ పరీక్ష, సూక్ష్మ పోషకాల లోపాలను గుర్తించడం, అయోడిన్‌ సమస్య, ఫోలిక్‌యాసిడ్‌, ఐరన్‌లోపంతోపాటు విటమిన్‌ బీ12, విటమిన్‌ డీ పరీక్షలు చేసి చికిత్స, మందులు అంద‌జేత
- మూత్రకోశ సంబంధిత ఇన్ఫెక్షన్లు, పెల్విక్‌ ఇన్‌ఫ్లమేటరీ వ్యాధుల పరీక్షలు
- మెనోపాజ్‌ దశకు సంబంధించి పరీక్షలు. అవసరమైన వారికి హార్మోన్‌ రీప్లేస్మెంట్‌ థెరపీ చేయడంతోపాటు కౌన్సెలింగ్‌.
- నెలసరి, సంతాన సమస్యలపై ప్రత్యేకంగా పరీక్షలు, వైద్యంతో పాటు అవగాహన. అవసరమైనవారికి అల్ట్రాసౌండ్‌ పరీక్షలు.
- సెక్స్‌ సంబంధిత అంటువ్యాధుల పరీక్షలు చేసి, అవగాహన. అవసరమైన వారికి వైద్యం.
- బరువు నియంత్రణ, యోగా, వ్యాయామంపై అవగాహన.
పీహెచ్‌సీ, యూపీహెచ్‌సీ, బస్తీ దవాఖానల్లో ప్రతి మంగళవారం ప్రత్యేకంగా ఈ వైద్య పరీక్షలు చేయ‌నున్నారు. తొలి దశలో 100 ఆరోగ్య కేంద్రాల్లో ప్రత్యేక క్లినిక్‌లు ప్రారంభించ‌నున్నారు. ఆయా వైద్య పరీక్షలపై ప్రత్యే క యాప్‌ ద్వారా మానిటరింగ్ చేయ‌నున్నారు. ఎవరికైనా మెరుగైన వైద్యం అవసరమైతే రెఫర్ చేయ‌నున్నారు. పెద్దాసుపత్రుల్లో వారికి సాయం చేసేందుకు ప్రత్యేక హెల్ప్‌ డెస్‌లు ఉంటాయి.
