తెలంగాణలో గ్యాస్ సిలిండర్ల సరఫరాపై నిఘా.. 24/7 కమాండ్ కంట్రోల్ సెంటర్ ప్రారంభం!

తెలంగాణలో ఎల్‌పీజీ సిలిండర్ల పంపిణీని ఎప్పటికప్పుడు పర్యవేక్షించేందుకు పౌరసరఫరాల శాఖ శనివారం హైదరాబాద్‌లో 24/7 మల్టీ-ఏజెన్సీ కమాండ్ అండ్ కంట్రోల్ సెంటర్‌ను ప్రారంభించింది. గ్లోబల్ మార్కెట్‌లో ముడిచమురు లభ్యతపై ఆంక్షలు ఉన్నప్పటికీ, రాష్ట్రంలోని వినియోగదారులకు గ్యాస్ కొరత రాకుండా చూడటమే ఈ కేంద్రం ప్రధాన లక్ష్యం.

ఈ కంట్రోల్‌ సెంట్రల్‌ ద్వారా రాష్ట్రవ్యాప్తంగా గ్యాస్ రవాణా చేసే వాహనాలను GPS (జిపిఎస్) ద్వారా రియల్ టైమ్‌లో ట్రాక్ చేస్తారు. దీనివల్ల గ్యాస్ లోడ్ ఎక్కడ ఆగిపోయింది? ఎక్కడైనా మళ్లించారా? లేదా సరఫరాలో జాప్యం జరుగుతుందా? అన్న విషయాలను అధికారులు నిశితంగా గమనిస్తారు. పౌరసరఫరాల శాఖ కమిషనర్ ఎం. స్టీఫెన్ రవీంద్ర, IPS మాట్లాడుతూ.. చమురు సంస్థలు, జిల్లా యంత్రాంగం, డిస్ట్రిబ్యూటర్ల మధ్య ఈ కేంద్రం ఒక వారధిలా పనిచేస్తుందని తెలిపారు.

ఈ వ్యవస్థ ప్రత్యేకతలు:

చమురు సంస్థల సమన్వయం: ఇండియన్ ఆయిల్ (IOCL), భారత్ పెట్రోలియం (BPCL), హిందుస్థాన్ పెట్రోలియం (HPCL) ప్రతినిధులు ఈ కేంద్రంలో షిఫ్టుల వారీగా అందుబాటులో ఉంటారు. వారి వాహనాల ట్రాకింగ్ డేటాను ప్రభుత్వానికి నేరుగా అందుబాటులోకి తెచ్చారు. కేవలం చమురు సంస్థలే కాకుండా పోలీస్, పరిశ్రమల శాఖ అధికారులు కూడా ఇక్కడ ఉండి రవాణా అడ్డంకులను తొలగిస్తారు.

టోల్ ఫ్రీ నంబర్: వినియోగదారుల ఫిర్యాదుల కోసం 1967 టోల్ ఫ్రీ నంబర్‌ను కూడా ఈ కమాండ్ సెంటర్‌కు అనుసంధానించారు. దీనివల్ల గ్యాస్ బుకింగ్ లేదా డెలివరీ సమస్యలపై భక్తులు/వినియోగదారులు చేసే ఫిర్యాదులకు వెంటనే పరిష్కారం లభిస్తుంది.

జిల్లా స్థాయిలో ఎక్కడైనా గ్యాస్ కొరత ఏర్పడితే, వెంటనే ఈ కంట్రోల్ సెంటర్ ద్వారా సమీపంలోని స్టాక్ పాయింట్ల నుంచి గ్యాస్ పంపించేలా చర్యలు తీసుకుంటారు. దీనివల్ల గ్యాస్ బ్లాక్ మార్కెట్ కాకుండా అడ్డుకోవడంతో పాటు పారదర్శకత పెరుగుతుందని ప్రభుత్వం భావిస్తోంది.