Telangana: 'హాల్ టికెట్లు ఇవ్వాల్సిందే'.. ఇంటర్‌ విద్యార్థులకు హైకోర్టు ఊరట

హైదరాబాద్‌: ఇంటర్మీడియట్ పరీక్షల ఫీజు చెల్లింపులో తలెత్తిన సాంకేతిక సమస్యల కారణంగా హాల్ టికెట్లు పొందని విద్యార్థులకు తెలంగాణ హైకోర్టు పెద్ద ఊరటనిచ్చింది. సోమవారం ఈ మేరకు జస్టిస్ ఇ.వి. వేణుగోపాల్ కీలక ఆదేశాలు జారీ చేశారు. ఫీజు చెల్లింపులో సాంకేతిక లోపాల వల్ల హాల్ టికెట్లు నిలిచిపోయిన విద్యార్థులకు తక్షణమే హాల్ టికెట్లు జారీ చేయాలని తెలంగాణ స్టేట్ బోర్డ్ ఆఫ్ ఇంటర్మీడియట్ ఎడ్యుకేషన్ (TSBIE)ను కోర్టు ఆదేశించింది.

విద్యార్థులు ఇప్పటికే తమ కళాశాలలకు ఫీజు చెల్లించారని, కళాశాలలు మరియు బోర్డు మధ్య ఉన్న ఆన్‌లైన్ సిస్టమ్‌లో సాంకేతిక లోపం ఉంటే దానికి విద్యార్థులను బాధ్యులను చేయకూడదని కోర్టు స్పష్టం చేసింది.

తమ తప్పు లేకపోయినా విద్యార్థులను పరీక్షలకు దూరం చేయడం వారి హక్కులను హరించడమేనని జస్టిస్ వేణుగోపాల్ అభిప్రాయపడ్డారు. హాల్ టికెట్లు లేకపోవడం వల్ల ఈ విద్యార్థులు ఇప్పటికే కొన్ని ప్రాక్టికల్ పరీక్షలకు హాజరు కాలేకపోయారు. దీనిని పరిగణనలోకి తీసుకున్న హైకోర్టు, సదరు విద్యార్థుల కోసం ప్రత్యేకంగా మళ్లీ ప్రాక్టికల్ పరీక్షలను నిర్వహించాలని బోర్డును ఆదేశించింది. తదుపరి విచారణను మార్చి 26, 2026కు వాయిదా వేసింది.