రైలు ప్రయాణికులకు గుడ్‌న్యూస్‌.. క్యూఆర్‌ కోడ్‌తో టికెట్‌ బుకింగ్‌

రైల్వే టికెట్‌ జారీలో క్యూఆర్‌ కోడ్‌ సౌకర్యాన్ని గురువారం నుంచి దక్షిణ మధ్య రైల్వే జోన్‌ అందుబాటులోకి తెచ్చింది. రైలు ప్రయాణికులు సాధారణ బుకింగ్ కౌంటర్లలో క్యూఆర్ కోడ్ సౌకర్యం ద్వారా అన్‌రిజర్వ్‌డ్ టిక్కెట్లను కొనుగోలు చేయవచ్చని దక్షిణ మధ్య రైల్వే గురువారం తెలిపింది. సికింద్రాబాద్ డివిజన్‌లోని సికింద్రాబాద్, హైదరాబాద్, కాజీపేట, బేగంపేట, వరంగల్, మంచిర్యాల, లింగంపల్లి, హైటెక్ సిటీ, జేమ్స్ స్ట్రీట్, మహబూబాబాద్, బెల్లంపల్లి, ఫతేనగర్ బ్రిడ్జి, సిర్పూర్ ఖగజ్‌నగర్, వికారాబాద్‌లోని 14 స్టేషన్లలోని 31 కౌంటర్లలో ఈ నగదు రహిత లావాదేవీ అమలు చేయబడింది.

టికెట్‌ కొనుగోలు చేసే క్రమంలో.. తలెత్తే చిల్లర సమస్యలను సంపూర్ణంగా అధిగమించవచ్చని రైల్వే అధికారులు చెబుతున్నారు. క్యూఆర్‌(క్విక్ రెస్పాన్స్) కోడ్ సదుపాయం నగదును తీసుకువెళ్లే అవసరాన్ని, ఖచ్చితమైన మార్పును తీసుకొస్తుంది. డిజిటల్ చెల్లింపు ఎంపికను ప్రవేశపెట్టడానికి వాణిజ్య, సాంకేతిక సిబ్బంది కృషిని ఎస్‌సీఆర్‌ జనరల్ మేనేజర్ అరుణ్ కుమార్ జైన్ అభినందించారు. ఇదిలా ఉంటే.. ఫోన్‌పే, గూగుల్‌పే, భీమ్‌, పేటీఎం వంటి వాలెట్‌ ద్వారా టికెట్‌ బుకింగ్‌ కౌంటర్లలో క్యూఆర్‌ కోడ్‌ స్కాన్‌ చేసి టికెట్‌ పొందే సౌకర్యాన్ని కల్పించినట్టు పేర్కొన్నారు. ప్రయాణికుల సౌకర్యార్థం టికెట్‌ ధరల పట్టికను స్టేషన్లలో ప్రదర్శించాలని అధికారులు నిర్ణయించారు.