Video: కొండగట్టులో భారీ అగ్ని ప్రమాదం.. 30 దుకాణాలు దగ్ధం.. భారీగా ఆస్తి నష్టం
తెలంగాణలోని జగిత్యాల జిల్లా మల్యాల మండలంలో గల ప్రసిద్ధ ఆంజనేయ స్వామి పుణ్యక్షేత్రమైన కొండగట్టులో అర్ధరాత్రి భారీ అగ్ని ప్రమాదం జరిగింది.
By - అంజి |
కొండగట్టులో భారీ అగ్ని ప్రమాదం.. 30 దుకాణాలు దగ్ధం
తెలంగాణలోని జగిత్యాల జిల్లా మల్యాల మండలంలో గల ప్రసిద్ధ ఆంజనేయ స్వామి పుణ్యక్షేత్రమైన కొండగట్టులో అర్ధరాత్రి భారీ అగ్ని ప్రమాదం జరిగింది. కొండగట్టు ఆలయ దిగువన శనివారం రాత్రి 11.30 గంటల ప్రాంతంలో ప్రమాదవశాత్తు అగ్ని ప్రమాదం సంభవించింది. దాదాపు 30 దుకాణాలు మంటల్లో కాలి బూడిదయ్యాయి. ప్లాస్టిక్, ఆట బొమ్మలకు మంటలు అంటుకోవడంతో భారీగా మంటలు ఎగిసిపడ్డాయి. భారీగా ఆస్తి నష్టం జరిగింది.
విషయం తెలుసుకున్న వెంటనే అధికారులు విద్యుత్తు సరఫరాను నిలిపివేశారు. ఈ ప్రమాదంలో ఎలాంటి ప్రాణనష్టం వాటిల్లకపోవడంతో ప్రజలు ఊపిరిపీల్చుకున్నారు. ఉవ్వెత్తున ఎగసిపడ్డ మంటలను చూసి భయబ్రాంతులకు గురైన స్థానికులు భయంతో పరుగులు తీశారు. సమాచారం అందుకున్న అగ్నిమాపక శాఖ అధికారులు వెంటనే ఘటనా స్థలికి చేరుకుని మంటలను అదుపులోకి తీసుకువచ్చారు.
కొండగట్టు స్టేజీ వద్ద శనివారం రాత్రి 11 గంటల ప్రాంతంలో భారీ అగ్నిప్రమాదం చోటుచేసుకుంది. దాదాపు 32 బొమ్మల దుకాణాలకు నిప్పంటుకొని సామగ్రి కాలి బూడిదైంది. సమ్మక్క సారలమ్మ జాతరను పురస్కరించుకొని వ్యాపారులు భారీ మొత్తంలో బొమ్మలు కొనుగోలు చేసి నిల్వ చేసుకున్నారు. ఈ ప్రమాదంలో… pic.twitter.com/piJbxd6pct
— ChotaNews App (@ChotaNewsApp) November 30, 2025
ప్రమాదం సిలిండర్ పేలుడు వల్ల జరిగిందా లేదా షార్ట్ సర్క్యూట్ కారణమా అనేది తెలియాల్సి ఉంది. అయితే ప్రమాదం జరిగిన వెంటనే సమాచారం ఇచ్చినా ఫైర్ ఇంజిన్ ఆలస్యంగా వచ్చిందని బాధితులు ఆరోపిస్తున్నారు. భారీ నష్టం జరిగిందని ఆవేదన వ్యక్తం చేస్తున్నారు. భారీగా ఆస్తి నష్టం వాటిల్లడంతో వ్యాపారులు రోదిస్తున్నారు. పోలీసులు ఘటనా స్థలాన్ని పరిశీలించారు. అగ్ని ప్రమాదానికి ప్రధానం కారణం షార్ట్ సర్క్యూట్ అని పోలీసులు ప్రాథమికంగా అంచనా వేశారు.