Gadwal: లారీని ఢీకొట్టిన కారు.. నలుగురు దుర్మరణం

తెలంగాణలోని జోగులాంబ గద్వాల జిల్లాలో రోడ్డు ప్రమాదం సంభవించింది. స్కార్పియో వాహనం వేగంగా వెళ్లి వెనుక నుంచి లారీని ఢీకొట్టింది. ఈ ప్రమాదంలో నలుగురు అక్కడికక్కడే ప్రాణాలు కోల్పోయారు.

స్థానికులు తెలిపినవివరాల ప్రకారం.. ఆంధ్రప్రదేశ్‌లోని కర్నూల్‌ నుంచి హైదరాబాద్‌ వైపు స్కార్పియో వాహనం వస్తోంది. డ్రైవర్‌ నిద్రమత్తో లేదంటే.. అతివేగమో కారణం తెలియదు కానీ ముందు ఉన్న లారీని కారు ఢీకొట్టింది. ఈ ప్రమాద సమయంలో కారులో డ్రైవర్‌ సహా ముగ్గురు మహిళలు, ఇద్దరు బాలికలు, ఇద్దరు బాలురు ఉన్నారు. ప్రమాదంలో నలుగురు స్పాట్‌లోనే చనిపోయారు. మృతుల్లో డ్రైవర్ తో పాటు ఇద్దరు మహిళలు, ఒక బాలుడు ఉన్నారు. మిగతా వారికి తీవ్ర గాయాలు అయ్యాయి. లారీని వెనుక నుంచి బలంగా ఢీకొట్టడంతోనే ఈ ప్రమాదం జరిగిందని స్థానికులు చెబుతున్నారు. ఎర్రవల్లి చౌరస్తాలో ఈ ప్రమాదం జరిగింది.

ఇక రోడ్డు ప్రమాదం గురించి స్థానికుల ద్వారా సమాచారం తెలుసుకున్న పోలీసులు వెంటనే ఘటనాస్థలానికి చేరుకున్నారు. మృతదేహాలను కారులో నుంచి బయటకు తీశారు. గాయపడ్డ వారిని వెంటనే అంబులెన్స్‌ల్లో స్థానిక ఆస్పత్రికి తరలించారు. వారికి తీవ్ర గాయాలు అయ్యాయనీ.. చికిత్స పొందుతున్నట్లు సమాచారం. కాగా. ఈ సంఘటనపై కేసు నమోదు చేశామనీ.. దర్యాప్తు చేస్తున్నట్లు పోలీసులు చెప్పారు. ఈప్రమాదంలో మృతులు ఆంధ్రప్రదేశ్‌లోని ఆళ్లగడ్డకు చెందినవారుగా పోలీసులు భావిస్తున్నారు.