కరోనా నుండి కోలుకున్న సీఎం కేసీఆర్‌

సీఎం కేసీఆర్ కరోనా నుంచి కోలుకున్నారు. ర్యాపిడ్ యాంటీజెన్ పరీక్షలో సీఎంకు కొవిడ్ నెగెటివ్ నిర్థారణ అయింది. స్వల్ప లక్షణాలతో ఈ నెల 19న కేసీఆర్ కొవిడ్ పరీక్ష చేసుకోగా.. పాజిటివ్ వచ్చింది. అప్పట్నుంచి వైద్యుల సూచన మేరకు సీఎం ఎర్రవల్లిలోని ఫాంహౌస్‌లో ఐసోలేషన్​లో ఉన్నారు. వ్యక్తిగత వైద్యుడు ఎంవీ రావు నేతృత్వంలోని వైద్యుల బృందం కేసీఆర్ ఆరోగ్యాన్ని పరీక్షిస్తోంది.

మధ్యలో ఒకసారి సోమాజిగూడ యశోద ఆసుపత్రికి వెళ్లిన కేసీఆర్‌.. సీటీ స్కాన్ సహా ఇతర పరీక్షలు చేసుకున్నారు. ఛాతీలో ఎలాంటి ఇన్​ఫెక్షన్ లేదని సీటీ స్కాన్​లో తేలినట్లు వైద్యులు తెలిపారు. తాజాగా ముఖ్యమంత్రి కేసీఆర్​కు మరోమారు పరీక్షలు నిర్వహించారు. ర్యాపిడ్ యాంటీజెన్​తో పాటు ఆర్టీపీసీఆర్ పరీక్షలు నిర్వహించారు. ర్యాపిడ్ టెస్ట్​లో నెగెటివ్ రిపోర్ట్ వచ్చింది. ఆర్టీపీసీఆర్ ఫలితాలు రేపు రానున్నాయి.