తెలంగాణలో 5,008 అంగన్‌వాడీల అప్‌గ్రేడేషన్.. రూ.30 కోట్లు కేటాయించిన కేంద్రం

తెలంగాణ రాష్ట్రవ్యాప్తంగా ఉన్న 5,008 అంగన్‌వాడీ కేంద్రాలను ‘సక్షమ్ అంగన్‌వాడీలు’గా ఆధునీకరించాలని కేంద్ర ప్రభుత్వం నిర్ణయించినట్లు కేంద్ర మంత్రి జి. కిషన్ రెడ్డి ఆదివారం ఒక ప్రకటనలో తెలిపారు. ఇందుకోసం రూ. 30.04 కోట్లను కేంద్రం కేటాయించింది. 'మిషన్ సక్షమ్ అంగన్‌వాడీ', 'పోషణ్ 2.0' పథకాల కింద దేశవ్యాప్తంగా ప్రభుత్వ భవనాల్లో ఉన్న సుమారు రెండు లక్షల అంగన్‌వాడీ కేంద్రాలను బలోపేతం చేయడమే లక్ష్యంగా కేంద్ర మహిళా మరియు శిశు అభివృద్ధి మంత్రిత్వ శాఖ ఈ చర్యలు చేపట్టింది.

సక్షమ్ అంగన్‌వాడీలలో ఉండే ప్రత్యేక వసతులు:

సాధారణ అంగన్‌వాడీల కంటే మెరుగైన మౌలిక సదుపాయాలతో వీటిని రూపొందిస్తున్నారు. వీటిలో ప్రధానంగా పాఠాల బోధన కోసం LED స్క్రీన్లు, పరిశుభ్రమైన తాగునీటి కోసం వాటర్ ఫిల్ట్రేషన్ సిస్టమ్స్, పోషకాహార అవసరాల కోసం 'పోషణ్ వాటిక' (న్యూట్రిషన్ గార్డెన్స్), చిన్నారుల కోసం ముందస్తు విద్యా సామగ్రి మరియు భవనం గోడలపై విద్యాపరమైన చిత్రాలు (BaLA పెయింటింగ్స్) వంటివి ఉంటాయి.

ఆరోగ్యం, పౌష్టికాహారంపై ప్రత్యేక దృష్టి:

గర్భిణీ స్త్రీలు, బాలింతలు, చిన్నారులలో రక్తహీనతను నివారించడానికి, మైక్రోన్యూట్రియెంట్ లోపాలను సరిచేయడానికి అంగన్‌వాడీల ద్వారా ఫోర్టిఫైడ్ రైస్ (బలవర్ధకమైన బియ్యం) పంపిణీ చేస్తున్నారు. అలాగే, వారానికి కనీసం ఒకసారైనా వేడి వేడి భోజనం మరియు 'టేక్ హోమ్ రేషన్'లో చిరుధాన్యాల వాడకాన్ని తప్పనిసరి చేస్తూ కేంద్రం ప్రాధాన్యతనిస్తోంది.

జిల్లాల వారీగా అప్‌గ్రేడ్ అయ్యే కేంద్రాల వివరాలు:

రాష్ట్రవ్యాప్తంగా అత్యధికంగా మేడ్చల్-మల్కాజ్‌గిరి జిల్లాలో 948 కేంద్రాలు సక్షమ్ అంగన్‌వాడీలుగా మారనున్నాయి. భద్రాద్రి కొత్తగూడెంలో 509, కరీంనగర్‌లో 365, సంగారెడ్డిలో 298, సిద్దిపేటలో 238 చొప్పున కేంద్రాలను ఎంపిక చేశారు. హైదరాబాద్ జిల్లాలో 10, హన్మకొండలో 65, వరంగల్‌లో 54 కేంద్రాలు ఈ జాబితాలో ఉన్నాయి. ఈ ఆధునీకరణ ద్వారా చిన్నారులకు మెరుగైన విద్యతో పాటు పౌష్టికాహారం అందుతుందని మంత్రి ఆకాంక్షించారు.