యూపీఎస్సీ అభ్యర్థులకు ఏపీలో ప్రత్యేక రైళ్లు

యూనియన్‌ పబ్లిక్‌ సర్వీసెస్‌ కమిషన్‌ (యూపీఎస్సీ) పరీక్షలు రాసే అభ్యర్థుల కోసం ఏపీలో ప్రత్యేక రైళ్లు నడవనున్నాయి. విజయవాడ డివిజన్‌ పరిధిలో రెండు ప్రత్యేక రైళ్లను పడనున్నట్లు దక్షిణ మధ్య రైల్వే వెల్లడించింది. అయితే ఈ పరీక్ష మే 31న జరగాల్సి ఉండగా, కరోనా కారణంగా ఆ పరీక్షలను అక్టోబర్‌ 4కు వాయిదా వేశారు. దీంతో పరీక్షలకు సంబంధించి ఏర్పాట్లు జరుగుతున్నాయి. ఇక పరీక్ష రాసే అభ్యర్థులను దృష్టిలో ఉంచుకుని ఈ ప్రత్యేక రైళ్లను ఏర్పాటు చేశారు. విజయవాడ నుంచి విశాఖకు ఒక రైలు, విశాఖ నుంచి విజయవాడకు మరో రైలును నడపనున్నట్లు రైల్వే అధికారులు ఒక ప్రకటనలో తెలిపారు.

విజయవాడ - విశాఖ

ఈ రైలు అక్టోబర్‌ 3న మధ్యాహ్నం 3 గంటలకు విజయవాడ స్టేషన్‌ నుంచి బయలుదేరుతుంది. అదే రోజు అంటే శనివారం రాత్రి 10 గంటలకు విశాఖ చేరుకుంటుంది.

విశాఖ - విజయవాడ

ఈ రైలు అక్టోబర్‌ 4న ఆదివారం రాత్రి 8.30 గంటలకు విశాఖ స్టేషన్‌ నుంచి బయలుదేరుతుంది. మరుసటి రోజు సోమవారం తెల్లవారుజామున 4 గంటలకు విజయవాడ చేరుకుంటుంది.

ఈ రెండు ప్రత్యేక రైళ్లు మార్గమధ్యలో ఏలూరు, తాడేపల్లిగూడెం, నిడదవోలు, రాజమండ్రి, సామర్లకోట, తుని, అనకాపల్లి, దువ్వాడ రైల్వే స్టేషన్‌లలో ఆగుతాయి. దూర ప్రాంతంలో ఉండే అభ్యర్థులు యూపీఎస్సీ పరీక్షకు సకాలంలో హాజరయ్యేందుకు ఈ సదుపాయం కల్పిస్తున్నామని, అభ్యర్థులు ఈ రైలు సేవలను వినియోగించుకోవాలని అధికారులు సూచించారు.